मकवानपुरको मनहरीमा स्कार्पियो र कार ठोक्किँदा दुई जनाको मृत्यु

हेटौंडा, २७ पुष । मकवानपुरको मनहरी गाउँपालिकामा स्कार्पियो र कार ठोक्किँदा दुई जनाको मृत्यु भएको छ ।
दुर्घटनामा घाइते चितवनको राप्ती नगरपालिका–२ गड्यौली बस्ने ५० वर्षीय सुनिता श्रेष्ठको उपचारको क्रममा मृत्यु भएपछि मृतकको संख्या दुई पुगेको हो ।
यसअघि, दुर्घटनामा कार चालक हेटौंडा–४ स्कुलरोडका वरिष्ठ कराँते प्रशिक्षक ६० वर्षीय सुरेन्द्रलाल श्रेष्ठको मृत्यु भएको थियो ।
शनिबार वीरगञ्जबाट चितवनतर्फ जाँदै गरेको बागमती प्रदेश ०१–०२६ च ५२५० नम्बरको स्कार्पियो र चितवनबाट हेटौंडातर्फ आउँदै गरेको बा १६ च ८३२४ नम्बरको कार पूर्व–पश्चिम राजमार्गअन्तर्गत मनहरी–६ मा ठोक्किएका थिए ।
मकवानपुरका प्रहरी नायब उपरीक्षक श्यामु अर्यालका अनुसार दुर्घटनामा १४ जना घाइते भएका छन् । घाइतेमध्ये दुई जनाको मृत्यु भएको छ ।
कारलाई ठक्कर दिने स्कार्पियो चालक २० वर्षीय किशन जैसवाल फरार रहेका छन् । उनको खोजी भइरहेको डिएसपी अर्यालले जानकारी दिए ।
घाइते हुनेमा कारमा सवार चितवनको राप्ती–२ गड्यौली बस्ने ५५ वर्षीय ओमकुमार श्रेष्ठ, २१ वर्षीया सुमिना श्रेष्ठ, स्कार्पियोमा सवार पर्साको वीरगञ्ज–२ छपकैया बस्ने २६ वर्षीय पूजा देवी साह, ८ वर्षीया प्रियान्सी शाह, २३ वर्षीया सुरदी देवी र २१ वर्षीया निशाकुमारी शाह रहेका छन् ।
यस्तै, बीरगञ्ज–२ छपकैयाका १५ वर्षीय ओम शंकर साह, १९ वर्षीय राजिवकुमार साह, १९ वर्षकी आरती कुमारी साह, ४ वर्षीया दिव्याकुमारी साह, १६ वर्षीय सरोज शर्मा र १९ वर्षीया रोशनी शर्मा पनि घाइते भएका छन् ।
घाइते अधिकांशको हात, खुट्टा र शरीरका विभिन्न भागमा गम्भीर चोट लागेको छ । सबैलाई उपचारका लागि चितवनको भरतपुर अस्पताल पठाइएको छ ।
यसैबिच, कार दुर्घटनामा ज्यान गुमाएका वरिष्ठ कराँते प्रशिक्षक सुरेन्द्रलाल श्रेष्ठ र सुनिता श्रेष्ठप्रति नेपाल लोकतान्त्रिक खेलकुद संघ र नेपाल कराँते महासंघले श्रद्धाञ्जली अर्पण गरेको छ ।
यस अप्रिय घटनाले सम्पूर्ण समाजलाई शोकमग्न बनाएको नेपाल लोकतान्त्रिक खेलकुद संघ धनुषाका अध्यक्ष तथा नेपाल कराँते महासंघ धनुषाका उपाध्यक्ष अखिल मढिकर्मीले बताए ।
उनले दुबैजनाको असामयिक निधनले खेलकुद क्षेत्र र समाजलाई अपूरणीय क्षति पुगेको बताए ।
त्यस्तै, नेपाल कराँते महासंघ धनुषाका अध्यक्ष विरेन्द्र कर्ण र नेपाल कराँते महासंघ मधेश प्रदेशका अध्यक्ष रामचन्द्र ठाकुरले मृतकहरूप्रति गहिरो दुःख व्यक्त गर्दै हार्दिक श्रद्धाञ्जली अर्पण गरेका छन् ।
दुर्घटनामा घाइते भएकाहरूको शीघ्र स्वास्थ्यलाभको कामना गरिएको छ ।

