सुनसरी, २७ पुष । सुनसरीको इटहरीमा आज दोस्रो तरुण दल खुल्ला दौड प्रतियोगिताको आयोजना गरिएको छ ।

नेपाल तरुण दल इटहरी उपमहानगरपालिका–७ नम्बर वडा कार्यसमितिको आयोजना र नेपाली कांग्रेस इटहरी–७ नम्बर वडा कार्यसमितिको सह–आयोजनामा प्रतियोगिता सम्पन्न भएको हो ।

५ किलोमिटरको दौड प्रतियोगिता बिहान ६ बजे इटहरी–७ को वडा कार्यालयबाट सुरु भएको थियो । जसमा पुरुषतर्फ सरोज लिम्बू प्रथम स्थान हासिल गरेका छन् भने ओशन राईले दोस्रो र यम राज खत्रीले तेस्रो स्थान प्राप्त गरेका छन् । त्यस्तै, महिलातर्फ लक्ष्मी राई प्रथम, रेना खाङ दोस्रो र स्मृति चौधरीले तेस्रो स्थान हासिल गरेकी छन् ।

नेपाल तरुण दल इटहरी–७ का सभापति अतित राईको सभापतित्वमा आयोजित कार्यक्रममा इटहरी उपमहानगरपालिकाका मेयर तथा नेपाली कांग्रेस इटहरीका नगर सभापति हेम कर्ण पौडेल प्रमुख अतिथिको रूपमा सहभागी भएका थिए ।

कार्यक्रममा नेपाल तरुण दल सुनसरीका सभापति सिजन गुरुङ्ग, इटहरी–७ का वडाध्यक्ष देवनारायण चौधरी, इटहरी–८ का वडाध्यक्ष रोहित चौधरी, वडा नम्बर–१ का वडाध्यक्ष कैलाश कार्की, वडा नम्बर–१३ का वडाध्यक्ष चन्देश्वर सरदार, निवर्तमान वडाध्यक्ष नर बहादुर राई, इठहरी–७ का वडा सभापति हेमा चौधरीलगायतका व्यक्तिहरु विशिष्ट अतिथिको रुपमा सहभागी भएका थिए ।

स्वास्थ्य र उत्साहको प्रवद्र्धन गर्न दौड प्रतियोगिताको आयोजना गरिएको नेपाली कांग्रेस इटहरी–७ का उपसभापति जयनारायण चौधरीले बताए ।

प्रतियोगिताको उद्देश्य मुख्य रूपले नगरवासीहरूलाई शारीरिक स्वास्थ्य र मानसिक उत्साहको प्रवद्र्धन गर्नु रहेको उनले बताए । यसले स्थानीय समुदायमा एकजुटता र उत्साहको वातावरण सृजना गर्नको लागि महत्वपूर्ण योगदान पुर्याएको विश्वास गरिएको छ ।

प्रतियोगितामा भाग लिएका सबै प्रतिस्पर्धीहरूले एकजुट भएर स्वस्थ जीवनशैलीको महत्व र खेलकुदको मूल्यलाई फैलाउनको लागि सकारात्मक सन्देश दिएका छन् ।