जनकपुरधाम, २० पुष । भारतका सुप्रसिद्ध गायिका अनुराधा पौडवालले मैथिली गीतमा आफ्नो स्वर दिएकी छिन् ।

मिथिला राज्य अभियानी शिशिर कुमार झाद्वारा लिखित एवम् मिथिलाका चर्चित संगीतकार सुनील पवनद्वारा संगीतबद्ध गरिएको गीतलाई ए–वन फिल्म्स र मिशन मिथिला फाउण्डेशनको अगुवाईमा तयार गरिएको हो ।

गीतको शब्द ‘अवतार अहीं सीता’ मा माता सीताको वर्णन गरिएको छ । यस गीतलाई चाँडै मिथिलाबासीसमक्ष प्रस्तुत गरिने भएको छ ।

गीत गाएपछि अनुराधा पौडवालले आफ्ना लागि यो सौभाग्यको कुरा रहेको बताइन् । उनले माता सीतामाथि आधारित गीत गाउने अवसर पाउनु आफ्नो ठूलो सौभाग्य रहेको सुनाइन् ।

उनले भनिन्, ‘सियाराम र श्रीराममाथि आधारित रहेर धेरै गीतहरु बनेका होलान् । तर, माता सीतामाथि पहिलोचोटी मैले गीत बन्दै गरेको देखें । मिथिलावासीका लागि यो मेरो तर्फबाट उपहार हुनेछ ।’