जनकपुरधाम, १३ पुष । नेपाल प्रिमियर लिग (एनपीएल) को उपाधि विजेता टिम जनकपुर बोल्ट्सका खेलाडीहरु ट्रफीसहित आज महोत्तरी, सर्लाही र रौतहट पुगेका छन् ।

मधेश प्रदेशका सबै जिल्लामा विजयोत्सव मनाउने क्रममा टोली आज महोत्तरी पुगेको हो । टोलीलाई मटिहानी र जलेश्वरका नगरबासीहरुले भव्य स्वागत गरेका थिए ।

मटिहानी नगरपालिकाका प्रमुख हरिप्रसाद मण्डल र जलेश्वर नगरपालिकाका नगरप्रमुख सुरेश साह सोनारले विजेता टोलीको भव्य स्वागत गरेका थिए । विजेता टिमका खेलाडीलाई फूलका माला तथा दोसल्ला ओढाएर उनीहरुले सम्मान गरे ।

नगर परिक्रमाका क्रममा गुरुकूल परिसर पुगेका जनकपुर बोल्टसका खेलाडीलाई वटुकले वैदिक मन्त्रले स्वस्तीवाचन गरेका थिए ।नगरबासीले खेलाडीलाई काँधमा बोकेर खुशी व्यक्त गरेका थिए ।

जनकपुर बोल्टस्का प्रबन्ध निर्देशक निरज खतिवडाले आम नागरिकको चासो र आफूहरुले जितमा देखिएको खुसी एवं आत्मीयताबाट आफू्हरुलाई ऊर्जा मिलेको बताए ।

विजयउत्सवको शुरूवात जनकपुरधामबाटै गरिएको छ । जनकपुर बोल्ट्सका प्रबन्ध निर्देशक निरज खतिवडाले मधेश प्रदेशको आठवटै जिल्लामा विजयउत्सव मनाइने जानकारी दिए ।

खतिवडाले शुक्रबार पहिलो दिन जनकपुरधामको जानकी मन्दिर, शनिबार दोस्रो दिन महोत्तरीको जलेश्वर, सर्लाही र रौतहट, आइतबार तेस्रो दिन बारा र पर्साको वीरगञ्ज र सोमबार चौथो दिन सिरहा र सप्तरीको राजविराजमा ट्रफि परेड गरिने जानकारीसमेत दिएका छन् ।नेपालमा पहिलो पटक आयोजना गरिएको एनपीएल प्रतियोगिताको विजेता जनकपुर बोल्ट्स टिम बनेको हो ।

जनकपुर बोल्ट्सले गत शनिबार काठमाडौंको कीर्तिपुरस्थित त्रिभुवन विश्वविद्यालयको खेलमैदानमा भएको एनपीएलको फाइनल खेलमा सुदूरपश्चिम टिमलाई ५ विकेटले पराजित गर्दै उपाधि कब्जा गरेको थियो ।