जनकपुरधाम, १२ पुष । नेपाल प्रिमियर लिग (एनपीएल) को उपाधि विजेता टिम जनकपुर बोल्ट्सका खेलाडीहरु ट्रफिसहित नगर परिक्रमा गरेका छन् ।

शुक्रबार दिउँसो रजौलस्थित निर्माणाधिन रामजानकी बहुउद्देश्यीय अन्तर्राष्ट्रिय रंगशालामा राष्ट्रिय क्रिकेट संघ धनुषाले खेलाडीहरुलाई सम्मान गरेपछि ट्रफिसहित नगर परिक्रमा सुरु गरिएको थियो ।

मधेश प्रदेशका मुख्यमन्त्री सतिशकुमार सिंह पनि खेलाडीहरुसँगै नगर परिक्रमामा सहभागी भएका थिए । खेलाडीहरूसँगै जनकपुरधामका हजारौँ युवा तथा समर्थकहरु नगर परिक्रमामा सहभागी थिए । उनीहरूलाई चोक–चोकमा भव्य स्वागत गरिएको थियो ।

खेलाडीहरूको सम्मानमा बाजागाजासहितको टोलि जनकपुरधाममा नगर परिक्रमा गरेका छन् । जनकपुर बोल्ट्सले मधेश प्रदेशका सबै जिल्लामा विजयउत्सव पनि मनाउने भएको छ । विजयउत्सवको शुरूवात जनकपुरधामबाटै गरिएको छ । जनकपुर बोल्ट्सका प्रबन्ध निर्देशक निरज खतिवडाले मधेश प्रदेशको आठवटै जिल्लामा विजयउत्सव मनाइने जानकारी दिए ।

खतिवडाले शुक्रबार पहिलो दिन जनकपुरधामको जानकी मन्दिर, शनिबार दोस्रो दिन महोत्तरीको जलेश्वर, सर्लाही र रौतहट, आइतबार तेस्रो दिन बारा र पर्साको वीरगञ्ज र सोमबार चौथो दिन सिरहा र सप्तरीको राजविराजमा ट्रफि परेड गरिने जानकारीसमेत दिएका छन् ।

टिमका विदेशी खेलाडीहरू फर्किइसकेकाले स्वदेशी सबै खेलाडीहरू विजयउत्सवमा सहभागी गराइएको उनले जानकारी दिए ।

नेपालमा पहिलो पटक आयोजना गरिएको एनपीएल प्रतियोगिताको विजेता जनकपुर बोल्ट्स टिम बनेको हो ।

जनकपुर बोल्ट्सले गत शनिबार काठमाडौंको कीर्तिपुरस्थित त्रिभुवन विश्वविद्यालयको खेलमैदानमा भएको एनपीएलको फाइनल खेलमा सुदूरपश्चिम टिमलाई ५ विकेटले पराजित गर्दै उपाधि कब्जा गरेको थियो ।

हेर्नुहोस् २० तस्बिरहरु :

तस्बिरहरु : पत्रकारद्वय घनश्याम मिश्र र प्रमोद साह