जनकपुरधाम, ११ पुष । नेपाल प्रिमियर लिग (एनपीएल)को विजेता जनकपुर बोल्ट्स टिम आज साँझ जनकपुरधाम आउन लागेको छ ।

जनकपुर बोल्ट्स टिम आज साँझ जनकपुरधाम आउने र भोलि (शुक्रबार) रजौलस्थित रामजानकी अन्तर्राष्ट्रिय रंगशालाबाट खेलाडीहरूको सम्मानमा नगरपरिक्रमा गरिने जिल्ला क्रिकेट संघ धनुषाका अध्यक्ष शोभाकान्त पाण्डे (गुड्डु)ले जानकारी दिए । उनले भोलि साँझ जानकी मन्दिरमा ट्रफीसमेत प्रदर्शन गरिने बताए ।

खेलाडीहरूको सम्मानमा बाजागाजासहितको टोलि जनकपुरधाम विमानस्थल पुग्नेछ । जिल्ला क्रिकेट संघले टोलिलाई भव्य स्वागतसहित भोलि नगरपरिक्रमा गराउने छ ।

जनकपुर बोल्ट्सले मधेश प्रदेशका सबै जिल्लामा विजयउत्सव पनि मनाउने भएको छ । विजयउत्सवको शुरूवात र अन्त्य जनकपुरधामबाटै गरिने छ । जनकपुर बोल्ट्सका प्रबन्ध निर्देशक निरज खतिवडाले मधेश प्रदेशको आठवटै जिल्लामा विजयउत्सव मनाइने जानकारी दिएका छन् ।

खतिवडाले भने, ‘जनकपुर बोल्ट्सले मधेशलाई प्रतिनिधित्व गर्ने भएकाले यो प्रदेशका आठवटै जिल्लामा विजयउत्सव मनाउन लागेका छौँ ।’

प्रबन्ध निर्देशक खतिवडाले शुक्रबार पहिलो दिन जनकपुरधामको जानकी मन्दिर, शनिबार दोस्रो दिन महोत्तरीको जलेश्वर, सर्लाही र रौतहट, आइतबार तेस्रो दिन बारा र पर्साको वीरगञ्ज र सोमबार चौथो दिन सिरहा र सप्तरीको राजविराजमा ट्रफि परेड गरिने जानकारीसमेत दिएका छन् ।

टिमका विदेशी खेलाडीहरू फर्किइसकेकाले स्वदेशी सबै खेलाडीहरू विजयउत्सवमा सहभागी हुनेगरी कार्यक्रम बनाइएको उनले जानकारी दिए ।

नेपालमा पहिलो पटक आयोजना गरिएको एनपीएल प्रतियोगिताको विजेता जनकपुर बोल्ट्स टिम बनेको हो ।

जनकपुर बोल्ट्सले शनिबार काठमाडौंस्थित त्रिभुवन विश्वविद्यालयको खेलमैदानमा भएको एनपीएलको फाइनल खेलमा सुदूरपश्चिम टिमलाई ५ विकेटले पराजित गर्दै उपाधि कब्जा गरेको थियो ।