जनकपुरधाम, ४ पुष । नेपालमा जारी नेपाल प्रिमियर लिग (एनपीएल) क्रिकेट प्रतियोगिताको फाइनल भिडन्त नेपाली समयअनुसार शनिवार दिउँसो सवा १२ बजे हुँदैछ ।

फाइनलको उपाधि भिडन्त जनकपुर बोल्ट्स र सुदूरपश्चिम रोयल्सबीच हुँदैछ । यस्तोमा मधेशमा सुदूरपश्चिमका भन्दा धेरै फ्यानहरु जनकपुरको पक्षमा देखिएका छन् । यीमध्ये केही फ्यानहरुले अनौठा क्रियाकलाप गर्न थालेका छन् ।

जनकपुरलाई उपाधि जिताउने शक्तिका लागि केही फ्यानले होमदेखि पूजापाठ पनि गर्ने घोषणा गरेका छन् । उनीहरुका यस्ता गतिविधि अहिले सामाजिक सञ्जालमा भाइरल भइरहेका छन् ।

जनकपुर बोल्ट्सको समर्थनमा शनिबार बिहान ९ बजेदेखि राजदेवी मन्दिरमा विशेष पूजापाठ गरिने भएको छ । महावीर युवा कमिटीका अध्यक्ष अजय कुमार गुप्ताले जनकपुरलाई एनपीएलको उपाधि जिताउन भगवानसँग प्रार्थना गर्दै राजेदेवीमा विशेष पूजापाठ गरिने बताए ।

अध्यक्ष गुप्ताले जनकपुर बोल्ट्सलाई ग्रहका कारण हुन सक्ने बाधा फुकाउने उद्धेश्यले पूजा गर्न लागिएको बताए । उनले जनकपुर बोल्ट्सको एनपीएल जित्ने चहाना पूरा गराउनका लागि ग्रहहरूको बाधा–अड्चन फुकाउन विशेष पूजापाठ गरिने बताए ।