जनकपुरधाम, ४ पुष । मधेश प्रदेश क्रिकेट टोलीका कप्तान हरिशंकर साहले नेपाल प्रिमियर लिग (एनपीएल)को सम्पूर्ण सम्झौता रकम जनकपुर क्रिकेट एकेडेमीलाई रोलर खरिदका लागि प्रदान गर्ने घोषणा गरेका छन् ।

सामाजिक सञ्जाल फेसबुकमा उनले लेखेका छन्, ‘एनपीएलबाट आउने अनुबन्धितको सम्पूर्ण रकम जनकपुर क्रिकेट एकेडेमीलाई रोलर किन्न दिनेछु । अहिले एकेडेमीका सिनियर खेलाडिहरु (विक्रन्त, सुजीत, साजन, सरफराज, रणजीत, दीपक, रोहन र अरू)एकेडेमी सञ्चालन गर्दैछन् ।’

जनकपुरधामको क्रिकेटलाई अगाडि बढाउन अन्तर्राष्ट्रिय स्तरको टर्फ विकेट (क्रिकेट खेल्ने पिच) अति आवश्यक रहेको छ । सो विकेट बनाउनका लागि एउटा राम्रो पिच रोलरको आवश्यकता रहेको जनकपुर क्रिकेट एकेडेमीको भनाइ छ ।

जनकपुरधाममा क्रिकेट खेल्ने पिचको अभाव रहेकोले बालबालिकाहरुलाई अप्ठ्यारो भइरहेको अवस्थालाई दृष्टिगत गर्दै आफूले एनपीएलबाट पाउने करिव २ लाख ४० हजार रुपैयाँ रोलर खरिदका लागि जनकपुर क्रिकेट एकेडेमीलाई प्रदान गर्ने साहले बताए ।

उनले अहिले बजारको अवस्था पनि ठिक नरहेको र विभिन्न व्यक्ति तथा संस्थाहरुबाट सहयोगको लागि आह्वान गरेपनि आवश्यक सहयोग प्राप्त हुन नसकेकोले व्यक्तिगत तवरबाटै पहलहरु गर्न लागेको जानकारी दिए ।

सो पिच रोलर जनकपुरधामसम्म ल्याउन लगभग ९ लाख ९० हजार २०८ रुपैयाँ खर्च लाग्ने अनुमान गरिएको छ ।

हरिशंकरलाई एनपीएलको टिम पोखरा एभेन्जर्सले ४ वटा म्याचका लागि अनुबन्धित गरेको थियो ।