जनकपुरधाम, २५ मंसिर । मधेश प्रदेशको रौतहट जिल्लामा स्कारपियो दुर्घटना हुँदा चालकसहित ८ जनाको मृत्यु भएको छ भने पाँच जना घाइते भएका छन् ।

पूर्वपश्चिम राजमार्गअन्तर्गत चन्द्रपुर नगरपालिका–४ धन्सार पुल नजिकैको जंगलमा निजगढबाट चन्द्रनिगाहपुरतर्फ आउँदै गरेको बा १६ च ३१६२ नम्बरको स्कारपियो दुर्घटना भएको हो ।

बाराको गढीमाई दर्शन गरेर सिरहा फर्कँदै गरेका दर्शनार्थी बोकेको स्कारपियो अनियन्त्रित भई सडकबाट तल दाहिने साइडको रुखमा ठोक्किएको प्रहरीले जनाएको छ ।

दुर्घटनामा परि मृत्यु हुनेहरूमा सिरहाको अर्नमा गाउँपालिका–३ बंठियाटोलका ६० वर्षीया लरुवतीदेवी महरा, सोही ठाउँकी ३० वर्षीया उर्मिला महरा, ५० वर्षीया रामकुमारी महरा, ५५ वर्षीया महगींदेवी महरा, ६२ वर्षीया फुलमन्तिदेवी चमार, ६० वर्षीया रामकुमारीदेवी महरा, ३० वर्षीया सकुन्तलादेवी महरा र सोही गाउँपालिका–५ बलुवाटोलका ४० वर्षीय स्कारपियो चालक श्रीकुमार यादव रहेका छन् ।

दुर्घटनामा अर्नमा–३ की ३० वर्षीया राधा राम, सोही ठाउँका उमेश रामका २ वर्षीय छोरा आर्यन, २५ वर्षीया देवकुमारी महरा, उनका ७ वर्षीय छोरा रितिक महरा र अर्नमा–३ कै ६० वर्षीया कन्यादेवी महरा घाइते भएका छन् ।

उनीहरूको हाइवे ट्रम्मा सेन्टर अस्पताल र वीरगञ्जको बयोधा अस्पतालमा उपचार भइरहेको प्रहरीले जनाएको छ ।