जनकपुरधाम, ७ मंसिर । यु–१९ महिला क्रिकेट टोलीकी कप्तान पूजा महतोलाई अहिले सम्मान तथा पुरस्कार थाप्न भ्याइनभ्याइ भएको छ ।

हालै युनाइटेड अरब इमिरेट्स (युएई) मा यु–१९ महिला टी–२० विश्वकप प्रतियोगितामा छनोट भएर घर फर्केदेखि पूजालाई भेट्ने, बधाई दिने र सम्मान तथा पुरस्कार दिनेको लर्को लागेको छ ।

गत शुक्रबार आफ्नो घर महोत्तरीको गौशाला नगरपालिका–९ डुमरवाना आएदेखि पूजालाई दिनहुँ बधाई र सम्मान तथा पुरस्कार दिनेको लाम लाग्ने गरेको छ ।

राष्ट्रिय गहना महतोलाई शुक्रबार महोत्तरी गाउँपालिकाले स्वागत तथा सम्मान गरेको छ । पालिका अध्यक्ष दिलीप कुमार पाण्डेयले एक कार्यक्रमको आयोजना गरि महतोलाई नगद ५१ हजारसहित दोसल्ला ओढाएर सम्मान गरेको नेपाल क्रिकेट संघ (क्यान)का धनुषा जिल्ला अध्यक्ष शोभाकान्त पाण्डेय (गुड्डु)ले बताए ।

नेपाललाई पहिलो पटक आइसीसी महिला यु–१९ विश्वकपमा पुर्याउन विशेष भुमिका निर्वाह गरेको भन्दै नेपाली टोलीकी कप्तान महतोलाई नगदसहित सम्मान गरेको महोत्तरी गाउँपालिकाका अध्यक्ष पाण्डेयले बताए । उनले आफ्नो पालिका खेलकुदको विकास र गतिविधिमा कहिल्यै पछाडि नहटने प्रतिबद्धतासमेत व्यक्त गरे ।

नेपाल क्रिकेट संघ (क्यान)का उपाध्यक्ष रोशन सिंहको प्रमुख आतिथ्यमा आयोजित कार्यक्रममा सम्मान ग्रहण गर्दै कप्तान महतोले भनिन, ‘विश्वकपमा उत्कृष्ट खेल प्रदर्शन तथा एशिया कप उचाल्ने अबको हाम्रो लक्ष्य हो । अहिले हामीप्रति आम रुपमा दर्शाइएको सकारात्मक चासोले अब झन राम्रो गर्नुपर्ने दायित्वबोध भएको छ । सबैको प्रेम र हौसलाले सम्पूर्ण टिमको उर्जा थपेको छ ।’