जनकपुरधाम, ६ मंसिर । धनुषामा स्कूल बसले ठक्कर दिँदा एक बालिकाको मृत्यु भएको छ ।

जिल्लाको धनुषाधाम नगरपालिका वडा नम्बर–३ मा बिहिबार बिहान बाल आवासीय ईङ्गलिश बोर्डिङ्ग स्कूलको बसले ठक्कर दिंदा स्थानीय किशोरी ठाकुरको साढे २ बर्षिया छोरी मनिता ठाकुरको घटनास्थलमै मृत्यु भएको हो ।

धनुषाधाममा ठाकुरको पसल रहेको छ । सडकको दुवै पेटीमा उनको आयरन स्टोर रहेको छ । एक पसलबाट अर्को पसलमा जाँदै गर्दा विद्यालयको ना १ क ९६९६ नम्बरको बसले बालिकालाई किचेको प्रत्यक्षदर्शीहरुले बताए ।

नाम र ठेगाना खुल्न नसकेका बस चालकलाई तत्कालै पक्राउ गरी प्रहरीको जिम्मा लगाइएको छ । चालकको नाम नखुलाएपछि चालक परिवर्तन गर्ने षडयन्त्र हुन सक्ने जनाइएको छ ।

धनुषामा सञ्चालनमा रहेका दर्जनौं नीजि विद्यालयहरुको बस चालकसँग सवारी चालक अनुमति पत्र नरहेको बताइन्छ ।