सुनसरी, ३ असोज । बिहीबार देशभर “संविधान दिवस” मनाइएको छ । देशका विभिन्न स्थानमा विभिन्न कार्यक्रमको आयोजना गरि नवौं संविधान दिवस भव्यताका साथ मनाइएको हो ।

यसैबीच, सुनसरीको इटहरीमा पनि संविधान दिवस भव्यताका साथ मनाइएको हो । इटहरी उपमहानगरपालिका वडा नम्बर–७ स्थित गडीघाट चोकमा नेपाली काँग्रेस इटहरी–७ ले साँझ झण्डोत्तोलनसहित नेपालको राष्ट्रिय झण्डा बनाई दीप प्रज्वलन गरेर संविधान दिवसलाई भव्य रुपमा मनाएको हो ।

कार्यक्रममा बोल्दै संविधान सभा सदस्य रेखा प्रसाईंले लामो समयको संघर्षपछि २०७२ असोज ३ गते जारी भएको संविधानको रक्षा गर्नु र यसका मूल मर्महरूलाई अक्षरशः पालना गर्नु राजनीतिक दल, जनप्रतिनिधि, कर्मचारीलगायत आम नागरिकको कर्तव्य रहेको बताइन् ।

संविधानले हाम्रा धेरै हकअधिकार सुनिश्चित गरेको बताउँदै संविधानमा जायज मागहरूलाई सम्बोधन गर्न सकिने भएकोले सबै पक्षलाई समेट्दै मुलुकको सार्वभौमिकता र राष्ट्रिय अखण्डतालाई कायम राख्नुपर्ने उनको धारणा थियो ।

कार्यक्रममा नेपाली काँग्रेस इटहरी–७ का उपसभापति जयनारायण चौधरीले २०७२ असोज ३ गते जारी भएको संविधानले नेपाली जनताको हकअधिकार सुनिश्चित गरेकोले यसलाई राष्ट्रिय पर्व सरह नै मान्नुपर्नेसमेत बताए ।

दिवसकै अवसरमा नेपाली काँगे्रस वडा समिति–७ ले पार्टी कार्यालय स्थापना गरि उद्घाटनसमेत गरेको छ ।

कार्यक्रममा संविधान सभा सदस्य रेखा प्रसाईं, निवर्तमान वडाध्यक्ष नरबहादुर राई, नेपाल तरुण दलका अध्यक्ष अतित राई, आदिवासी जनजातीका अध्यक्ष गोवीन्द चौधरी, नेपाली काँग्रेसका क्षेत्रिय सदस्य कमल पाण्डे, लक्ष्मी डोजोका प्रशिक्षक अनिष राज धामीलगायत नेपाली काँग्रेसका युवा नेताहरू, समाजसेवी एवम् सर्वसाधारणकोसमेत उल्लेख्य उपस्थिति रहेको थियो ।