विराटनगर, २३ भदौ । मोरङमा चट्याङ लागेर एक बालकको मृत्यु भएको छ भने एक बालिका घाइते भएकी छन् ।

आइतबार दिउँसो खेलिरहेको अवस्थामा चट्याङ् पर्दा सुनवर्षी नगरपालिका–९ मुस्लिम टोलका हमिद आलमका ११ वर्षीय छोरा सोफियन आलम मियाँको मृत्यु भएको हो ।

चट्याङ लागेर राजाबुल आलमकी ८ वर्षीया छोरी नजारा खातुन घाइते भएको जिल्ला प्रहरी कार्यालय मोरङका प्रवक्ता प्रहरी नायव उपरीक्षक ज्ञानेन्द्रबहादुर बस्नेतले जानकारी दिए ।

डीएसपी बस्नेतका अनुसार राजाबुलको घर पछाडि रहेको कटहरको रुखमुनि खेलिरहेका बेला आइतबार दिउँसो २ बजेतिर चट्याङ परेको थियो ।

चट्याङ लागेर घाइते भएकी बालिकाको अवस्था सामान्य रहेको र उनको रंगेली अस्पतालमा उपचार भइरहेको मोरङ प्रहरीले जनाएको छ ।