सुनसरी, १६ साउन । नेपाली कांग्रेस इटहरी उपमहानगरपालिका वडा नम्बर–७ ले ८औं दक्षिण एसियाली कराँतेका रजत पदक विजेता स्वीकार चौधरीलाई नगदसहित सम्मान गरेको छ ।

इटहरी उपमहानगरपालिका–७ मा स्थायी रुपमा बसोबास गरिरहेका खेलाडी चौधरी, उनका अभिभावक र प्रशिक्षकलाई नेपाली कांग्रेसले सम्मान गरेको हो ।

फुल कन्ट्याक कराँते खुल्लातर्फ रजत पदक विजेता चौधरीलाई कार्यक्रमका प्रमुख अतिथि नेपाली कांग्रेस सुनसरी क्षेत्र नम्बर–३ (क) का सभापति दीपक ढकालले सम्मान स्वरूप नगद १० हजार १०० प्रदान गरेका थिए । चौधरीसँगै उनका आमाबुवा र प्रशिक्षक अनिश राजधामीलाईसमेत सम्मान गरिएको थियो ।

खेलाडीको हौसला र प्रोत्साहनका लागि नेपाली कांग्रेस इटहरी उपमहानगरपालिका वडा नम्बर–७ ले खेलाडीलाई सम्मान गरेको नेपाली कांग्रेस इटहरी–७ का उपसभापति एवम् कार्यक्रमका संयोजक जयनारायण चौधरीले बताए ।

‘इटहरी–७ बाट खेल्ने खेलाडीहरुलाई हामीले अब कुनैपनि खेलकुदमा लाग्दा अभाव नहुने गरी कुनै प्रकारको सहयोग गर्न तयार छौं, तपाईले आफ्नो वडादेखि जिल्ला, क्षेत्र हुँदै राष्ट्रको नाम उँचो हुने गरी खेल्नुहोस तपाईको आवश्यकता हामी पुरा गर्न प्रयत्न गर्नेछौं,’ उनको भनाई थियो ।

जुलाई १३ देखि २० तारिखसम्म भुटानमा आयोजना भएको जुनियर यू–२१ मा इटहरीस्थित लक्ष्मी कराँते डोजोका खेलाडी चौधरी छनोटमा पर्न सफल भएका थिए । गत ६ वर्षदेखि कराँते खेल्दै गरेका उनी जिल्लादेखि प्रदेश हुँदै राष्ट्रिय स्तरसम्म प्रथम स्थान हासिल गरिसकेका छन् ।