धरान, १४ बैशाख । सुनसरीको बराहक्षेत्रको कुम्भमेलामा सेवा नै धर्म हो भनेर सशस्त्र प्रहरीले उदाहरणीय काम गरिरहेको देखिएको छ ।

बराहक्षेत्रको मेलामा वेहोश भएकी एक युवतीलाई सशस्त्र प्रहरीका प्रहरी नायव निरीक्षक रोहित बहादुर भुजेलले तत्कालै उद्धार गरि अस्पताल पुर्याएका हुन् ।

धार्मिक एवम् पर्यटकीय स्थल सुनसरीको बराहक्षेत्र नगरपालिका १ चतराधाममा बाह्रबर्षे महाकुम्भ मेला चैत २७ गतेदेखि सुरु भएको छ । मेलामा सहभागी हुन नेपाल लगायत भारतबाट समेत श्रद्धालु भक्तजनहरुको ओइरो लागेको छ । यसैक्रममा मेलामा २६ वर्षिया एक युवती बेहोश भएर ढलेपछि मेलामा सुरक्षार्थ खटेका सशस्त्र प्रहरी नायव निरीक्षक भुजेलले तत्कालै सो युवतीलाई उद्धार गरेर अस्पताल पुर्याएका थिए ।

त्यहाँस्थित अस्पतालमा उपचार सम्भव नभएपछि विराटनगर रेफर गर्नेसम्म प्रनानि भुजेलले सहयोग गरेका थिए । “प्रहरी हाम्रो साथी”को नारालाई सार्थक बनाएका भुजेल जस्ता प्रहरीको मुलुकमा असाध्य आवश्यकता रहेको स्थानियको भनाई छ ।