जनकपुरधाम, ९ बैशाख । धनुषाको हंसपुर नगरपालिकास्थित बघचौडामा आयोजित फिरन बाबा स्मृति खुल्ला भलिबल प्रतियोगिताको उपाधि बारा टीमले जितेको छ ।

शनिबार बघचौडामा भएको सो प्रतियोगिताको फाइनल खेलमा बाराले बघचौडालाई पराजित गरेको हो।

प्रतियोगितामा बघचौडा टीम द्वितीय र धनुषाको टोकी टीम तृतीय भएका छन्। प्रथम हुने टिमले १ लाख ११ हजार, द्वितीयले ५५ हजार र तृतीयले २५ हजार रुपैयाँ नगद पुरस्कार प्राप्त गरेका छन्।

फाइनल खेलमा बाराले बघचौडालाई ट्राइबेकरमा ३-० गोल अन्तरले पराजित गरेको छ। बारा टीमले लगातर तीन सेट जितेर बघचौडा टीमलाई हराउँदै प्रथम पुरस्कारमाथि कब्जा जमाउन सफल भयो ।

मधेश प्रदेशका सभामुख रामचन्द्र मण्डलको प्रमुख आतिथ्यमा प्रतियोगिता सम्पन्न भएको हो। कार्यक्रममा सभामुख मण्डल, सांसद मनिष झा, मधेश प्रदेशका पूर्वमन्त्री तथा फुटबल संघ मधेश प्रदेशका अध्यक्ष ज्ञानेन्द्र कुमार यादवसहितकाले विजयी खेलाडी, विभिन्न विधामा उत्कृष्ट खेलाडी तथा टीमलाई ट्रफी, नगद पुरस्कार तथा प्रमाणपत्र प्रदान गरेका थिए।

राष्ट्रिय स्वतन्त्र पार्टीका सांसद मनिष झाका हजुरबुवा फिरन झाको स्मृतिमा नवमिथिला फाउण्डेशनले उक्त प्रतियोगिताको आयोजना गर्दै आएको छ ।

सभामुख मण्डलले खेलकुदले रचनात्मक तथा सिर्जनात्मक क्षमता अभिवृद्धि गर्न प्रभावकारी भूमिका निर्वाह गरेको बताए। विश्वमा आफ्नो देशलाई पहिचान दिलाउने माध्मम खेलकुद भएकोले यसमा तीनैतहको सरकारको लगानी आवश्यक रहेको उनले बताए ।

कार्यक्रममा सांसद झाले कुनै समय भलिबल खेलमा आफ्ना गाउँ अब्बल रहेपनि कालान्तरमा युवाहरू वैदेशिक रोजगारीतर्फ पलायन भएपछि खेलकुलप्रति आकर्षण घट्दै गएकोले खेलप्रति युवाहरुको आकर्षण बढाउन प्रतियोगिताको आयोजना गरिएको बताए ।

आफ्ना हजुरबुबा समेत भलिबल खेलाडी रहेको उल्लेख गर्दै झाले भने,‘ यस्ता प्रतियोगिताहरुलाई निरन्तरता दिदै गएको खण्डमा पुनः युवामा खेलकुदप्रति आकर्षण बढ्ने छ ।’

पूर्वमन्त्री यादवले खेलकुदको विकासको लागि तीनै तहको सरकार गम्भिर हुनुपर्ने बताए ।

बैशाख १ गतेदेखि सुरू भएको प्रतियोगितामा कुल २२ वटा टीमको सहभागिता रहेको नवमिथिला फाउण्डेशनका अध्यक्ष अमित साहले जानकारी दिए ।