जनकपुरधाम, २४ माघ । जनकपुरधाममा सम्पन्न पाँच दिवसीय जनकपुरधाम साहित्य कला तथा अन्तर्राष्ट्रिय नाट्य महोत्सवमा यहाँको चर्चित संस्था मिथिला नाट्य कला परिषद् (मिनाप)को नाटक दर्शकले असाध्यै मन पराएका छन् ।

जनकपुरधामका साहित्यकार रोशन जनकपुरीले लेखन तथा मिनापका वरिष्ठ कलाकार सुनिल मिश्रको निर्देशनमा भएको “जोगाड” नामको नाटक दर्शकले धेरै मन पराएका हुन् ।

मिनापका कलाकारहरूले अभिनय गरेको उक्त नाटक मार्फत नेपालको अहिलेको राजनीतिक तथा प्रशासनिक विकृतिलाई सशक्त रुपमा उजागर गर्ने सफल प्रयास गरेका थिए । यसका साथै युवाहरूमा रहेको बेरोजगारीका कारणले रोजगारी पाउन प्रहरीको आश्वासनमा सहिदको शालिक बन्न विवश रहेको देखाइएको थियो ।

अत्यधिक चिसोका कारणले जागिरको लोभमा सहिदको शालिक बनेका गाउँका साधारण युवाको अत्यधिक चिसोले ज्यान गएको मार्मिक अवस्था नाटक मार्फत प्रदर्शन गरिएको थियो ।

मैथिली रङ्गमञ्चमा आफ्नो फरक स्थान बनाउन सफल भएका मिनापको नाटकमा मदन ठाकुर, विष्णुकान्त झा, राजेश सक्सेना, ज्योति झा, आलोक मिश्र, सुरेन्द्र राय, मुकेश झा, सन्नी राउत सहितका कलाकारहरूले जीवन्त अभिनय गरेका थिए । पाश्र्व गायनको भूमिका सङ्गीता देव र ललित कामतले गरेका थिए भने वाद्यवादन रामनारायण ठाकुरले गरेका थिए ।

नाटकको शुरुवात सुखद, मध्यमा गम्भीर तथा अन्त्यमा शोक सहित दुःखान्त रुपमा समापन भएको थियो ।

मिनापको नाटक हेर्न जनकपुरधामको महेन्द्रनारायण निधि मिथिला संस्कृति केन्द्रको सभाहल दर्शकले खचाखच भरेको थियो ।

नाटकमा सहभागी भएका सबै कलाकारहरूलाई जनकपुरधाम उपमहानगरपालिकाका नगरप्रमुख मनोजकुमार साहले प्रमाणपत्र मायाको चिनो उपहार प्रदान गरेका थिए ।