जनकपुरधाम, ३० मंसिर । जनकपुरधाममा एक बालकको हत्या भएको छ ।

जनकपुरधाम उपमहानगरपालिका वडा नम्बर–१२ हनुमाननगरस्थित मामाको घरमा बस्दै आएका अन्दाजी १०÷११ वर्षीय बालक आदित्य ठाकुरको हत्या भएको हो ।

शुक्रबार साँझ घरबाट निस्केका बालक आदित्य नआएपछि उनका परिवारले बेलुका ८ बजेतिर प्रहरीलाई खबर गरेका थिए ।

खोजतलास गर्ने क्रममा हनुमाननगरमै बालक घाइते अवस्थामा फेला परेको जिल्ला प्रहरी कार्यालय धनुषाका प्रवक्ता प्रहरी नायव उपरीक्षक रञ्जन अवाले जानकारी दिए । घाइते बालकलाई उपचारको लागि प्रादेशिक अस्पतालमा लगेकोमा उपचारकै क्रममा उनको मृत्यु भएको डीएसपी अवाले बताए ।

उनका अनुसार बालक फेला पर्दा उनको अनुहारमा चोटपटक लागेको थियो भने कानबाट रगतसमेत बगेको थियो । प्रहरीले अनुसन्धानकै क्रममा दुई जनालाई नियन्त्रणमा लिएर सोधपुछ गरिरहेको डिएसपी अवाले बताए ।

यस सम्बन्धमा थप अनुसन्धान भइरहेको प्रहरीले जनाएको छ ।