राजेश्वर नेपाली टि–२० प्रतियोगिताको पाँचौ दिनको खेलमा कपिलेश्वर क्रिकेट टिम विजयी

जनकपुरधाम, २४ मंसिर । प्रेस तथा प्रजातन्त्र स्वतन्त्रता सेनानी बरिष्ठ पत्रकार राजेश्वर नेपालीको स्मृतिमा जनकपुरधाम उपमहानगरपालिका वडा नंं २३ बेलामा जारी महामना राजेश्वर नेपाली टि–२० क्रिकेट प्रतियोगिताको पाँचौं दिनको खेलमा आइतबार धनुषाको कपिलेश्वर क्रिकेट टिम विजयी भएको छ ।
कपिलेश्वर र महोत्तरीको भँगहा नगरपालिका–२ क्रिकेट टिमबीच भएको खेलमा कपिलेश्वर क्रिकेट टिम २० रनले जीत हासिल गरेको हो ।
टस जितेर पहिले ब्याटिङ गरेको कपिलेश्वरले प्रस्तुत गरेको ९७ रनको लक्ष्य पछ्याउने क्रममा भँगहा क्रिकेट टिम ७७ रनमै अलआउट भएपछि कपिलेश्वर क्रिकेट टिमको जीत दर्ज भएको छ ।
टस जितेर पहिले ब्याटिङ गरेको कपिलेश्वर क्रिकेट टिमले खेलेको आक्रामक खेल दर्शकहरुका लागि रोमाञ्चकारी रहेको थियो । उक्त खेलमा म्यान अफ दी म्याच कपिलेश्वर क्रिकेट टिमका धर्मेन्द्र यादव छोटुलाई घोषित गरियो ।
दूधमती युवा क्लब जनकपुरधाम–२३ वेलाको आयोजनामा जारी प्रतियोगितामा धनुषा तथा महोत्तरी जिल्लाका गरी १६ वटा क्रिकेट टिमको सहभागिता रहेको छ ।
१३ दिनसम्म चल्ने प्रतियोगितामा विजयी हासिल गर्नेका लागि प्रथम पुरस्कार ५५ हजार ५ सय ५५ र दोश्रो पुरस्कार २५ हजार ५ सय ५५ रुपैयाँ, प्रमाण पत्र र कप रहेको आयोजक जनकपुरधाम उपमहानगरपालिका वडा नं २३ का वडाध्यक्ष राघबेन्द्र प्रसाद साहले बताए ।
उनले यस प्रतियोगितालाई आगामी वर्षहरूमा समेत निरन्तरता दिने र उक्त खेल जनकपुरधामको लादोबेलास्थित १४ बिघा जग्गा रहेको राजेश्वर नेपाली खेलकूद मैदानमा आयोजना गरिने बताए ।

