विराटनगर, २४ मंसिर । सुनसरीको इटहरी उपमहानगरपालिकाले नगर क्षेत्रका सामुदायिक विद्यालयहरूको खाजाको सूची सार्वजनिक गरेको छ ।

बालकक्षादेखि कक्षा ६ सम्मका छात्रछात्राहरुलाई दिवा खाजामा दिइने खाजाको सूची सार्वजनिक गर्दै इटहरीले विद्यालयमा जंकफुड निषेध गरेको हो ।

इटहरी उपमहानगरपालिकाका मेयर हेमकर्ण पौडेलले विद्यालय खुल्ने ६ दिन फरक फरक खाजा खुवाउने र एक दिन मासु समेत समावेश गरिएको जानकारी दिए । आइतबार इटहरी उपमहानगरपालिका वडा नम्बर–१ मा सञ्चालित राष्ट्रिय माध्यमिक विद्यालयबाट कक्षा ६ का विद्यार्थीलाई खाजा खुवाएर नगरप्रमुख पौडेलले दिवा खाजाको शुरुवात गरेका छन् ।

सामुदायिक विद्यालयहरूमा अध्ययनरत बालबालिकाहरूलाई सङ्घीय सरकारले बाल कक्षादेखि पाँच कक्षासम्मका लागि प्रतिविद्यार्थी दिवा खाजाको रकम १५ रुपैयाँको दरले दिँदै आएको थियो । इटहरी उपमहानगरले बाल कक्षादेखि ६ कक्षासम्मका लागि विद्यालयमै पोषिलो दिवा खाजा खुवाउने व्यवस्था मिलाएको छ ।

दिवा खाजा कार्यक्रमका लागि संघीय सरकारले चालु आर्थिक वर्षका लागि इटहरी क्षेत्रभित्रका सामूदायिक विद्यालयका विद्यार्थीका लागि १ करोड ९८ लाख ८४ हजार रुपैयाँ अनुदान दिएको छ । उपमहानगरपालिकाले ३ करोड ६६ लाख १६ हजार रुपैयाँ थप गरी ५ करोड ६२ लाख ८० हजार ४५४ मा एरिना टिफिनलाई दिवा खाजाको ठेक्का दिएको छ । दिवा खाजा कार्यक्रममा इटहरी उपमहानगरपालिकाका ८ हजार २८ विद्यार्थी सहभागी छन् ।

कुन बार के खाजा ?

आइतबार : तीन किसिमका फलफूल, २१० ग्राम
सोमबार : अण्डा र चिउरा
मङ्गलबार : मिसाइएको गेडागुडीको तरकारी र चिउरा
बुधबार : चामलको खीर र तरकारी
बिहीबार : दही, चिउरा र तरकारी
शुक्रबार : खसी वा कुखुराको मासु र चिउरा, (शाकाहारीका लागि मटर पनिर)