मधेश सरकारद्वारा संघ सरकारलाई दिइएको एक महिने अल्टिमेट समाप्त, आन्दोलनको चेतावनी

काठमाडौं, २४ मंसिर । मधेश प्रदेश सरकारले प्रधानमन्त्री पुष्पकमल दाहाल प्रचण्डलाई ध्यानाकर्षण गराएको छ ।
प्रहरी समायोजन लगायत ६ सुत्रिय माग राख्दै दिएको एक महिने अल्टिमेटम सकिएपछि मधेश प्रदेश सरकारले प्रधानमन्त्री प्रचण्डलाई ध्यानाकर्षण गराएको हो ।
मुख्यमन्त्री सरोजकुमार यादवको नेतृत्वमा प्रमुख प्रतिपक्षी नेकपा एमालेसहित दलका नेताहरु प्रधानमन्त्री निवास बालुवाटारमा प्रधानमन्त्रीलाई भेटेर ध्यानाकर्षण गराएका हुन् ।
उनीहरुले संविधानमा व्यवस्था भएबमोजिमका सङ्घीय कानुनहरू चाँडो निर्माण गर्न प्रधानमन्त्रीको ध्यानाकर्षण गराएका छन् । एक महिनाभित्र प्रदेश प्रहरी समायोजन, निजामती सेवा ऐन लगायत कार्यान्वयन गरिसक्न दिएको अल्टिमेटम सकिएकाले आफूहरू सङ्घर्षमा जाने प्रधानमन्त्रीलाई चेतावनी दिएको मुख्यमन्त्री यादवले बताए ।
मुख्यमन्त्री यादवले समय थप गर्ने वा नगर्ने बारे गठबन्धन दल तथा प्रमुख प्रतिपक्षी दलका नेताहरुलाई भेटेर यस विषयमा ध्यानाकर्षण गराउने बताए । त्यसपछि दलका नेताहरु बसेर छलफल गरी संघर्षको विषयमा निर्णय लिने उनले जानकारी दिए ।

