पर्सा, २४ मंसिर । पर्सामा एक व्यक्तिले आफ्नो श्रीमतीलाई नक्कली आमा बनाएर पेन्सनको रकम उठाउँदै आएको रहस्योदघाटन भएको छ ।

पर्साको बहुदरमाई नगरपालिका–२ सिसयाडीका विकास यादवले आफ्नै श्रीमतीलाई कान्छी आमा बनाएर विगत ५ वर्षदेखि मृत्यु भइसकेका बुवाको सरकारी जागिर वापत आउने पेन्सनको रकम लिइरहेको पाइएको हो ।

मनकामना प्राथमिक विद्यालयको प्रधानाध्यापक रहेका विकासका बुवा विनोद यादवको अवकासपछि २०७४ सालमा मृत्यु भएको थियो । उनको श्रीमती मिनादेवी यादवको पनि मृत्यु भइसकेको छ ।

बुवाले पाउने पेन्सनका लागि विकासले श्रीमती संगीतालाई गीता देवीको नामले बुबासँगको कान्छी श्रीमती प्रमाणित गराई अर्को नागरिकता समेत निकालेका छन् । बुवाको मृत्युपछि विकासले आफ्नो श्रीमती संगिता देवीलाई कान्छी आमा बनाएर पेन्सन रकम उठाउँदै आएको खुलेपछि स्थानीय प्रमोद यादवले सरोकारवाला निकायमा उजुरी दिएका छन् ।

मुद्दा दर्ता भएपछि प्रहरीले थप अनुसन्धानका लागि विकासलाई नियन्त्रणमा लिएको छ । आर्थिक मिलेमतोमा वडाध्यक्ष जीतेन्द्र पटेलले श्रीमतीलाई कान्छी आमा बनाउन सहयोग पु¥याएको भन्दै उनीमाथि पनि मुद्दा दर्ता भएको छ । मृत्यु भइसकेको बुवाको पेन्सन लिनका लागि आफ्नै श्रीमतीलाई नक्कली आमा बनाएको सम्बन्धमा उजुरी आएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक कुमारविक्रम थापाले जानकारी दिए ।

उनले यसमा वडाध्यक्षलाई समेत प्रतिवादी बनाइएको जनाए । २०७५ असार १२ गते वडाध्यक्ष जितेन्द्र पटेलले गीतादेवी यादव विनोदप्रसाद यादवको श्रीमती भएको सिफारिस गरेका थिए ।