जनकपुरधाम, २१ मंसिर । औषधि व्यवस्था विभागले अनुगमन गर्न थालेपछि जनकपुरधामका अधिकांश औषधि पसल सञ्चालकले पसल बन्द गरेका छन् ।

वीरगञ्जस्थित औषधि व्यवस्था विभागका अधिकृत मुकेन्द्र पञ्जियारको नेतृत्वमा आएको टोलीले जनकपुरधामका औषधि पसल तथा फार्मेसीको अनुगमन गरिरहँदा पसल सञ्चालकहरू पसल बन्द गरेर भागेका हुन् ।

विभागको वीरगञ्ज शाखाका फार्मेसी अधिकृत सर्फराज अहमद खानले अनुगमनको क्रममा जनकपुरधाममा दर्ताबिना सञ्चालित अधिकांश औषधि पसल सञ्चालक पसल बन्द गरेर भागेको जानकारी दिए ।

उनले हस्पिटलको फार्मेसी, हलसेल फार्मेसी र औषधि पसल गरी जम्मा ६५ वटामा अनुगमन गरिएको बताए । अहमदले यहाँका अधिकांश अस्पतालमा आफ्नो फार्मेसी नभएको र सटर भाडामा दिएर बाहिरका व्यक्तिले सञ्चालन गरेको पाइएकोसमेत बताए ।

दर्ता भएका औषधि पसलहरूमा पनि फर्मासिस्ट उपलब्ध नभएको उनले जानकारी दिए ।

जनकपुरधाममा यसअघि पनि अनुगमन हुँदा अधिकांश औषधि पसल सञ्चालकहरू पसल बन्द गरेर भाग्ने गरेका थिए ।