जनकपुरधाम, मंसिर १७ गते । नेपाली काँग्रेसका नेता एवम् प्रतिनिधिसभा साँसद विमलेन्द्र निधिले प्रदेशमा आफ्नै प्रहरी हुनु पर्ने संवैधानिक व्यवस्थालाई तत्काल कार्यान्वयन गर्नु पर्ने माग अघि सारेका छन् ।

जनकपुरधामको धर्मसंस्थाद्दारा आयोजित भैरव साह लक्ष्मिनिया देवी छात्रवृति २०८०मा प्रमुख अतिथिको आसनबाट बोल्दै उनले सो माग गरेका हुन् । “सात वटै प्रदेशको आफ्नै प्रहरी संगठन हुनु पर्ने संविधानमा प्रष्ट रुपमा लेखिएको छ”,उनले भने तर अहिलेसम्म कार्यान्वयन हुन सकेको छैन यो दुखद हो । मधेश प्रदेश सरकारले यस अघि नै प्रहरी समायोजन ऐनबारे प्रक्रिया अघि थाले पनि अन्य प्रदेशमा यसबारे जानकारी नै नरहेको बताउँदै नेता निधिले भने,“अर्को चुनाव पछि अन्य प्रदेशका नेताहरुले पनि बुझ्न थालेका छन्”।

प्रहरी ऐन तत्काल कार्यान्वयन गर्नु पर्ने सरकारसंग माग गर्दै पूर्व गृहमन्त्री समेत रहेका नेता निधिले शान्तिपूर्ण आन्दोलनका लागि जनता तयार बसेको चेतावनी समेत दिए । संवैधानिक अधिकार प्राप्तिका लागि जनताले शान्तिपूर्ण आन्दोलनकालागि जहिले पनि तयार रहन आग्रह गर्दै उनले प्रहरी समायोजन ऐन पारित गराउनकालागि सबै पक्ष गंभीर भई लाग्नु पर्ने आवश्यकता औंल्याए ।

संघीय लोकतान्त्रिक गणतान्त्रिक शासन प्रणाली संसारकै उत्कृष्ट शासन प्रणाली रहेकोद बताउँदै उनले देशमा यहि प्रणाली रहनु पर्नेमा जोड दिए । भने,“यसमा रहेका कमिकमजोरीलाई सुधार गर्दै जानु पर्छ र यसैलाई सबलीकरण गर्नु पर्नेमा जोड दिनु पर्ने आजको आवश्यकता हो”।

नेता निधिले राजा कहिले पनि फर्किन नसक्ने व्यवस्था नै गाणतन्त्र रहेकोले राजा फर्किने कुनै सम्भावना नरहेको बताए । राजसंस्थाको कुनै आवश्यकता नै नरहेको स्पष्ट पार्दै नेता निधिले संघीय लोकतान्त्रिक गणन्त्रान्त्रिक व्यस्थालाई मलजल गरी सात वटै प्रदेशलाई सबल र समृद्ध बनाउन तर्फ लाग्नु पर्ने आजको घनिभूत आवश्यकता रहेको बताए । त्यस्तै उनले धर्मसंस्थाले दिँदै आएको योगदानबारे शब्दमा बयान गर्न नसकिने बताए ।

संस्थाका सभापति ताराचन्द्र साहको अध्यक्षतामा भएको सो छात्रवृति कार्यक्रम अन्तरगत धनुषासहित मधेश प्रदेशका ६ वटा जिल्लाका १८ जना छात्र छात्राहरुलाई प्रथम,द्दितीय र तृतीय गरी क्रमशः २५ हजार,२२ हजार र २० हजार नगद तथा प्रमाण पत्र प्रदान गरिएको थियो । सो अवसरमा संस्थाका शुभचिन्तक,स्थानीय बुद्धिजीवीलगायतका दर्जनौ व्यक्तिहरु सम्मानित भएका थिए ।