जनकपुरधाम, ९ मंसिर । जनकपुरधामस्थित प्रादेशिक अस्पतालमा शल्यक्रिया गर्दा गर्दै एक महिलाको मृत्यू भएपछि परिवारजनले डाक्टर भागेको आरोप लगाएका छन् ।

महोत्तरीको मटिहानी बस्ने हासिम राईनकी श्रीमति तजाबुल खातुनलाई शनिबार दिउँसो अप्रेशन थिएटरमा अप्रेशनकै क्रममा मृत्यू भएपछि अस्पतालको अवस्था तनावग्रस्त बनेको हो ।

शुक्रबार साँझ सुत्केरी व्यथा लागेपछि प्रादेशिक अस्पताल भर्ना गरिएकी खातुनलाई अप्रेशनको क्रममा मृत्यू भएको परिवारजनले आरोप लगाएका छन् । बच्चा भने सुरक्षित रहेको जनाईएको छ ।

जनकपुरकै एक हस्पिटलमा भर्ना गरी खातुनलाई बाहिर रिफर गरेकोमा प्रादेशिक अस्पतालमा भर्ना गर्न पुगेको जिल्ला प्रहरी कार्यालय धनुषाले प्रारम्भिक जानकारी दिए । प्रवक्ताका अनुसार, कुन हस्पिटलमा सुरुमा भर्ना गरिएको र कस्तो अवस्थामा प्रादेशिक अस्पतालमा ल्याईएको बारे छानबिन सुरु गरेको बताएको हो ।

जनकपुरको वैदेही हस्पिटलमा सुरुमा भर्ना गरिएकोमा अवस्था नाजुक हुन थालेपछि प्रादेशिक अस्पताल रिफर गरिएको परिवारजनले बताए ।

अहिले प्रादेशिक अस्पतालमा परिवारजन र कुरुवाहरु आन्दोलित भएपछि हस्पिटलको अवस्था तनावग्रस्त बनेको हो । अस्पतालको तनावग्रस्त भएपछि प्रहरी खटाईएको जिल्ला प्रहरी कार्यालय धनुषाले जनाएको छ ।्

यद्यपी, परिवारजनले भने डाक्टरकै लापरवाहीले मृत्यू भएको दाबी गरिरहेका छन् । अप्रेशन कुन डाक्टरले गरेको बारे जानकारी नभएको परिवारजनले बताए । अस्पतालको पूर्जामा डाक्टरको नाममा ८–८ लेखिएको छ । परिवारजनका अनुसार, सुत्केरीको मृत्यू भएपछि डाक्टर अप्रेशन थिएटरमै मृतकलाई छाडेर चोरीलुकी भागेको बताएका छन् । यस सन्दर्भमा मेसुलाई सम्पर्क गर्दा सम्पर्क हुन सकेनन् ।