जनकपुरधाम, ९ मंसिर । प्राचीन मिथिलाको राजधानी जनकपुरधाममा विद्यापति स्मृति पर्व २०८० विभिन्न कार्यक्रमको आयोजना गरी मनाइएको छ ।

विद्यापति स्मारक संरक्षण समितिले शनिबार भव्य समारोहको आयोजना गरी पर्व मनाएको छ ।

पर्वको अवसरमा नेपाल सरकारको पूर्व उपप्रधान तथा गृहमन्त्री विमलेन्द्र निधि,जनकपुरधाम उपमहानगरपालिकाका प्रमुख मनोज कुमार साह सहितका व्यक्तित्वहरुले विद्यापतिचोकमा रहेको विद्यापतिको स्मारकमा माल्यापर्ण गर्दै समारोहको प्रारम्भ गरेका थिए ।

संरक्षण समितिका अध्यक्ष चन्द्रमोहन चौधरीको अध्यक्षतामा भएको सो कार्यक्रममा प्रमुख अतिथिको आसनबाट बोल्दै नेपाली काँग्रेसका नेता समेत रहेका निधिले विद्यापतिको डीह(राजबनौली)बारे रहेको विवादबारे बोल्दै महोत्तरी,सिरहा,सप्तरी जहाँ रहे पनि विद्यापतिको डीह नेपालमै रहेकोले यसबारे खासै विवाद गर्नु पर्ने आवश्यकता नरहेको बताए । केहि विद्दानले महोत्तरी त कोहिले सिरहा तथा कोहीले सप्तरीको बनौली नै राजबनौली रहेको बताउँदै आएको स्मरण गराउँदै उनले भने,“जहाँ सुकै भए पनि नेपाल मै छ नि ।”

महोत्तरीको बनौली,सिरहा र सप्तरीको बनौली मध्ये विद्यापतिको स्थान कुन हो भन्नेमा विद्दानहरुको फरक मत देखिएको छ ।
केहि विद्दानहरुले विद्यापति मैथिलीको मात्र नभई हिन्दीको समेत आदिकवि रहेको चर्चा गर्दै नेता निधिले विद्यापतिको रचनाले लोकतन्त्र र मानवता समेत सिकाएको र उनको एक एक रचना प्रेरणादायी रहेको उल्लेख गरे ।
नेता निधिले संघीय लोकतान्त्रिक गणतान्त्रिक व्यवस्थालाई कसैले परिवर्तन गर्न नसक्ने दावी गर्दै भने,“ यस संविधानलाई कसैले बदल्न सक्तैन,यो अवस्थालाई कसैले परिवर्तन गर्न सक्दैन,गणतन्त्रलाई कसैले परिवर्तन गर्न सक्दैन,गणतन्त्रलाई कसैले बदल्न सक्दैन ।”

समारोहमा बोल्दै जउनपाका मेयर साहले विद्यापतिको योगदानबारे शब्दमा विश्लेषण गर्न असम्भव रहेको बताए ।विद्यापतिजीको हर एक रचनाका शब्दहरु ऋनुकरणीय मात्र होइन प्रेरणादायी रहेको मेयर साहको कथन थियो ।
कार्यक्रममा स्थानीय बुद्धिजीवी,विभिन्न भाषाका विद्दानसहितका व्यक्तिहरुको उल्लेखनीय सहभागिता रहेको सो कार्यक्रममा प्रमोद झाले वर्ण व्यवस्थामाथि व्यंग्य गर्दै कविता वाचन गरेका थिए ।