एजेन्सी, २३ असार । भारतको पश्चिम बंगालमा शनिबार पञ्चायत चुनावको क्रममा भएको हिंसामा १२ जनाको मृत्यु भएको छ । राज्यका विभिन्न भागमा ठूलो संख्यामा दर्जनौँ घाइते भएका छन् ।

बिबिसीका अनुसार सो क्रममा ठूलो मात्रामा हिंसात्मक झडपका अलावा आगजनी, बुथ कब्जा र नक्कली मतदानका सयौं उजुरी सार्वजनिक भएको सरकारी स्रोतले बताएको जनाएको छ । हिंसात्मक घटनामा १५ जनाको मृत्यु भएको गैरसरकारी स्रोतहरूले दाबी गरेका छन् ।

यता, तृणमूल कांग्रेसले तीन कार्यकर्ताको हत्या भएको आरोप लगाउँदै पञ्चायत निर्वाचनमा सुरक्षा व्यवस्था गर्न नसकेकामा सरकारको आलोचना गरेको छ । विपक्षी दलले आफ्ना कार्यकर्ता मारेको तृणमूलको आरोप छ ।

‘हाम्रो पार्टीका तीन कार्यकर्ताको रेजीनगर, तुफानगञ्ज र खारग्राममा हत्या गरिएको छ र दुईजना डोमकोलमा बन्दुकको गोलीबाट घाइते भएका छन्,’ लामो ट्विटर पोस्टमा टिएमसीका एक नेताले भनेका छन् ।

शुक्रबार राज्यका परगना, वीरभूम, दक्षिण दिनाजपुर र मुर्सिदाबादमा भएका झडपमा चारजना राजनीतिक दलका कार्यकर्ताले ज्यान गुमाएका थिए ।

पश्चिम बंगालमा त्रि–स्तरीय पञ्चायत प्रणाली अन्तर्गत गाउँ पञ्चायतका ६३,२२९ सिट, पञ्चायत समितिका ९ हजार ७३० सिट र २२ जिल्ला परिषद्का ९२८ सिट अर्थात् कुल ७३ हजार ८८७ सिटका लागि मतदान भएको थियो । जसमध्ये ९ हजार १३ सिटमा उम्मेदवार निर्विरोध निर्वाचित भएका छन् ।