कैलाली, ५ असार । सुदूरपश्चिम प्रदेशका आन्तरिक मामिला तथा कानुनमन्त्री पृथ्वीबहादुर सिंह सवार गाडी बझाङमा दुर्घटना हुँदा दुईजनाको मृत्यु भएको छ ।

दुर्घटनामा मन्त्री सिंहकी ५० बर्षीय श्रीमती अमृतादेवी सिंह र ६५ बर्षीय भाउजु जयादेवी सिंहको घटनास्थलमै मृत्यु भएको हो । दुर्घटनामा घाइते भएका मन्त्री सिंहको अवस्था अत्यन्तै गम्भीर रहेको प्रहरीले जनाएको छ ।

मन्त्री सिंहसहित उनका पीएसओ दीपक भण्डारी र चालक धर्मराज जोशीलाई थप उपचारका लागि हेलिकप्टरबाट नेपालगञ्ज लगिएको छ । प्रदेश सरकारको ०१ ००१ झ ४८० नम्बरको मन्त्री सवार गाडी मंगलबार डडेल्धुराबाट बझाङ जाने क्रममा जयपृथ्वी राजमार्गको बागथलाको धारछडा भने स्थानमा दुर्घटना भएको हो ।

डडेल्धुराबाट चैनपुर बझाङतर्फ जाँदै गरेको सुदूरपश्चिम प्रदेश सरकारका आन्तरिक मामिला तथा कानुनमन्त्री पृथ्बीबहादुर सिंह सवार गाडी एक्कासी सडकबाट करिब ५० मिटर तल कालङगा नदीको किनारमा खसेर दुर्घटनामा परेको थियो ।

तत्काल प्रहरी टोली घटनास्थलमा खटिएर उद्वार गरी घाइतेहरुलाई उपचारका लागि रितु पोलीक्लिनिक र प्राथमिक स्वास्थ्य केन्द्र देउरा बझाङमा पुर्याएको थियो ।