एजेन्सी, २८ जेठ । दक्षिणी युक्रेनमा आइतबार आएको विनाशकारी बाढीका कारण ७ बालबालिकासहित ३५ जना बेपत्ता भएका छन् ।खेर्सन क्षेत्रको अग्रपंक्तिमा रहेको रूसी नियन्त्रित काखोभका जुन ६ मा बाँध ध्वस्त भएपछि हजारौं मानिस भाग्न बाध्य भएका थिए ।

युक्रेनले निप्रो नदीमा रहेको बाँध रूसले भत्काएको आरोप लगाएको छ भने मस्कोले किएभले उक्त संरचनामा विष्फोट गराएको आरोप लगाएको छ ।

युक्रेनका आन्तरिक मामिलामन्त्री इगोर क्लाइमेन्कोले दक्षिणी क्षेत्र खेर्सन र माइकोलाइभका ७७ वटा सहर र गाउँ डुबानमा परेको बताएका छन् ।

क्लाइमेन्कोका अनुसार खेरसन क्षेत्रमा सात बालबालिकासहित ३५ जना हराइरहेका छन् । बाढीका कारण खेर्सन क्षेत्रमा पाँचजनाको मृत्यु भएको थियो भने माइकोलाइभ क्षेत्रमा एकजनाको मृत्यु भएको थियो ।

ती दुई क्षेत्रमा रहेका तीन हजार सात सयजनालाई सुरक्षितस्थलमा सारिएको उनले बताए । युक्रेनका अभियोजक जनरल एन्ड्री कोस्टिन र अन्तर्राष्ट्रिय फौजदारी अदालतका प्रतिनिधिले पनि बाढी प्रभावित क्षेत्रको भ्रमण गरेको उनको कार्यालयले जनाएको छ ।