एजेन्सी, २० जेठ । भारतको ओडिशाको बालासोरमा तीनवटा रेल एकआपसमा ठोक्किएपछि भयानक दुर्घटना भएको छ । जसमा अहिलेसम्म २८० जनाको मृत्यु भएको छ भने ९०० जनाभन्दा बढी घाइते भएको बताइएको छ ।

मृत्यु हुनेको संख्या लगातार बढिरहेको छ । दुर्घटनापछि उद्धार र राहत कार्य जारी छ । ओडिशाको बालासोरमा भएको रेल दुर्घटनापछि रेल मन्त्री अश्विनी वैष्णव घटनास्थल पुगेर जानकारी लिएका थिए । रेल मन्त्रीले उच्चस्तरीय छानबिनको आदेश दिएका छन् ।

दुर्घटनाका कारण धेरै रेलहरू रद्द गरिएका छन् । भारतको दर्दनाक रेल दुर्घटनाप्रति देश–विदेशका प्रमुखहरूले शोक व्यक्त गरिरहेका छन् ।

प्रधानमन्त्री नरेन्द्र मोदीले रेल दुर्घटनाबारे जानकारी लिँदै दुर्घटनाको स्थिति र कारणबारे समीक्षा बैठक आह्वान गरेका छन् ।