एजेन्सी, ११ जेठ । सन् २०२४ मा अमेरिकी राष्ट्रपति पदका लागि हुने निर्वाचनमा रोन डेसान्टिसले औपचारिक रुपमा आफ्नो उम्मेदवारी घोषणा गरेका छन् ।

उनले रिपब्लिकन पार्टीको तर्फबाट राष्ट्रपति पदको आगामी निर्वाचनका लागि आफ्नो उम्मेदवारी घोषणा गरेका हुन् । सामाजिक सञ्जाल ट्ीटरको प्रत्यक्ष प्रसारणमा समस्या आएपछि उनको उम्मेदवारी दर्ता प्रक्रियामा करिब २० मिनेट विलम्ब भएको थियो ।

रोनको उम्मेदवारी घोषणाको प्रत्यक्ष प्रसारण सुन्न ५ लाखभन्दा बढी ट्वीटर प्रयोगकर्ता व्यग्र प्रतीक्षामा थिए । त्यही समयमा ट्वीटरमा समस्या आएपछि केही समयका लागि प्रत्यक्ष प्रसारण अवरुद्ध बनेको थियो । प्राविधिक समस्या समाधान भएपछि पुनः रोनले सम्बोधन गर्दा त्यो सँख्या घटेर २ लाख ५० हजारमा झरेको थियो ।

४४ वर्षीय रोन अमेरिकी सेनाका पूर्वअधिकारी पनि हुन् । उनी अहिले फ्लोरिडाका ४६औँ गभर्नर पनि हुन् । उनले सन् २०१९ देखि उक्त पद समाल्दै आएका छन् । निकै लामो समयदेखि उनी राष्ट्रपति पदको आगामी निर्वाचनमा उम्मेदवार बन्ने कुरा चर्चामा थियो ।

सन् २०१३ देखि सन् २०१८ सम्म उनी अमेरिकी तल्लो सदनका सदस्य पनि थिए । उनले आफूले मात्र आगामी राष्ट्रपतीय निर्वाचनमा वर्तमान राष्ट्रपति जो बाइडेनलाई चुनौती दिन सक्ने दाबी गरेका छन् । यद्यपि, उनी गत नोभेम्बरमा मात्र फ्लोरिडाको गभर्नरमा पुनर्निर्वाचित भएका थिए ।