एजेन्सी, ४ जेठ । सिद्धारमैया कर्नाटकको मुख्यमन्त्री बनेका छन् । उनी भारतीय कंग्रेसबाट मुख्यमन्त्री बनेका हुन् ।

यसअघि मुख्यमन्त्रीका लागि डिके शिवकुमार पनि प्रतिस्पर्धामा थिए । तर, पार्टीका केन्द्रीय अध्यक्ष मल्लिकार्जुन खड्गेले सिद्धारमैयालाई मुख्यमन्त्रीमा छनोट गरेका भारतीय सञ्चारमाध्यमले जनाएका छन् ।

पार्टीका प्रदेश अध्यक्षसमेत रहेका शिवकुमार भने उपमुख्यमन्त्री बन्ने भएका छन् । मुख्यमन्त्रीका रूपमा सिद्धारमैयाले आउँदो शनिबार बेंगलुरुमा शपथ लिने बताइएको छ ।

बुधबार खड्गे र पूर्वअध्यक्ष राहुल गान्धी लामो छलफलपछि सिद्धारमैयालाई मुख्यमन्त्री बनाउने निर्णयमा भएको थियो ।

जनता परिवारबाट राजनीतिक यात्रा सुरु गरेका उनी सन् २००६ मा कंग्रेसमा आबद्ध भएका थिए ।