एजेन्सी, २६ बैशाख । पाकिस्तानका पूर्वप्रधानमन्त्री इमरान खान पक्राउ परेका छन् । खानलाई अल–कादिर ट्रस्ट प्रकरणमा पक्राउ गरिएको प्रहरीलाई उद्धृत गर्दै बिबिसीले जनाएको छ ।

उनलाई इस्लामावादस्थित हाई कोर्ट बाहिरबाट प्रहरीले पक्राउ गरेको हो । उनीमाथि पक्राउ परेपछि इस्लामावादमा धारा १४४ लगाइएको र त्यसको उल्लंघन गरे कारबाही हुने प्रहरीले चेतावनी दिएको छ ।

खानको पार्टी पिटिआईका नेता फवाद चौधरीले ट्विटरमा भनेका छन्, ‘पूर्वप्रधानमन्त्री इमरान खानलाई अदालत परिसरबाट पक्राउ गरिएको छ । वकिल र सर्वसाधारणलाई टर्चर दिइएको छ । इमरान खानलाई अज्ञात व्यक्तिले अज्ञात स्थानतर्फ लगेका छन् । इस्लामावाद हाई कोर्टका मुख्य न्यायाधीशले गृह सचिव र आइजीलाई १५ मिनेटभित्र अदालतमा पेस गर्न भनेका छन् ।’