एजेन्सी, १५ बैशाख । साइनाइड दिएर १२ जनाको हत्याको आरोपमा एक महिलालाई पक्राउ गरिएको छ ।

महिलाले हत्या गरेको भनिएका सबै मानिस उनका साथी, आफन्त र चिनजानकै व्यक्ति भएको बताइएको छ ।

सुरुवाती अनुसन्धानमा पैसाको लालचका कारण उक्त हत्या गरिएको जानकारीमा उल्लेख छ । तर कतिले भने महिलालाई ‘सिरियल किलर’ समेत भनिरहेका छन् । थाइल्यान्डको प्रहरी यसको अनुसन्धानमा जुटेको छ ।

थाई मिडियाको रिपोर्ट अनुसार ३२ वर्षीय यी महिलाको नाम सारात रंगसिवुथापार्न हो । उनी हाल गर्भवती छिन् । उनीमाथि १२ जनाको हत्याको आरोप छ । यी सबैको हत्या साइनाइड दिएर एउटै प्रकृतिबाट गरिएको आरोपमा उल्लेख छ । सारातलाई मङ्गलवार (२७ अप्रिल) मा बैंककमा पक्राउ गरिएको हो ।

सहरमा लगातार भइरहेको हत्यापछि प्रहरी सक्रिय अवस्थामा नै थियो । यसैबीच १४ अप्रिलमा सन्दिग्ध अवस्थामा सिरिपोर्न खानवोंग नामकी महिलाको मृत्यु हुन्छ । विशेष कुरा यो हो कि खानवोंग सारातसँग एक धार्मिक आयोजनामा गएकी थिइन् । यहाँ नदीको किनारामा उनको शव भेटिन्छ । खानवोंगको पोस्टमार्टम रिपोर्टमा उनको शरीरमा साइनाइड भेटिएको पुष्टि हुन्छ । त्यसपछि नै सारात प्रहरीको रडारमा आउँछिन् ।

मृत्युपछि खानवोंगको फोन, पैसा र ब्याग पनि गायब भएको देखेपछि प्रहरीको शङ्का थप गहिरिन्छ । अनुसन्धान अघि बढ्छ, त्यसपछि शङ्काको सुई सारात रंगसिवुथापार्न तिर घुम्छ । प्रहरीले उनीसँग एक बोतल साइनाइडसमेत फेला पारेको छ ।

प्रहरीले यस्तै असामान्य मृत्युबाट पीडित १२ व्यक्तिको सूची सङ्कलन गरेको छ जुन सारातसँग सम्बन्धित हुनसक्छ । सबै मृतकको उमेर ३३ देखि ४४ वर्षको बीचको थियो र उनीहरू सबैलाई सन् २०२० देखि अप्रिल २०२३ को बीचमा मारिएको थियो । खानवोंगको मृत्युपछि धेरै मानिसले आफ्ना परिवारजनको पनि यसरी नै हत्या गरिएको भन्दै दाबी गरे । उनीहरू सबैले सारात माथि नै आशङ्का व्यक्त गरेका छन् ।