एजेन्सी, ३ मंसिर । ७० को दशककी चर्चित अभिनेत्री जिनत अमानको शनिबार ७१ औं जन्मदिन हो । जीनत अमानले फिल्म उद्योगमा यस्तो समयमा पाइला राखेकी थिइन्, जब अभिनेत्रीहरु प्रायः भारतीय लुकमा देखिने गर्थे तर वेस्टर्न लुकमा देखिएपछि उनले इन्डस्ट्रीमा नयाँ ट्रेण्ड सुरु गरिन् । बोल्डनेसका कारण उनको छवि ‘सेक्स सिम्बोल’ को रह्यो । तर, पाँच दशक लामो करियरमा उनले जम्मा ३३ चलचित्रमा अभिनय गरिन् ।

बाबुआमाको सम्बन्धविच्छेद, बाबुको मृत्यु र आमाको दोस्रो विवाह झेलेकी जीनत अमानको बाल्यकाल निकै उथलपुथल रह्यो । विभिन्न ठाउँमा बस्दा जीनत अमानको पढाइ पनि अधुरो रह्यो ।

पत्रकारको रुपमा आफ्नो करियर सुरु गरेकी जीनतले मोडलिङमा पनि धेरै नाम कमाएकी थिइन् । फेमिना मिस इन्डिया र मिस एशिया प्यासिफिक इन्टरनेशनलको उपाधिसमेत जितिन् । त्यसपछि उनी फिल्मतिर लागिन् र त्यहाँ पनि सफल नै भइन्, तर जीवनभर आफ्नो जीवनसाथीको मायाका लागि भने लालायित भइरहिन् । पहिलो बिहेमा धोका पाइन्, दोस्रो बिहे पनि सफल भएन । दोस्रो श्रीमान्को १३ वर्षपछि नै मृत्यु भयो तर दुर्भाग्यवश ससुराले उनलाई श्रीमान्को अन्तिम दर्शनमा जान दिएनन् ।