काठमाडौं, २ कार्तिक । कमेडियन अपूर्वक्षितिज सिंहविरूद्ध काठमाडौं जिल्ला अदालतमा चार वटा शीर्षकमा मुद्दा दर्ता भएको छ ।

बुधबार काठमाडौं जिल्ला अदालतमा सरकारी वकिलको कार्यालयले मुद्दा दर्ता गरेको कार्यालयका प्रमुख तथा सहन्यायाधीवक्ता अच्युतमणि न्यौपानेले जानकारी दिए ।

उनका अनुसार उनीविरूद्ध चार वटा शीर्षकमै मुद्दा दर्ता भएको छ । नेवाः अभियन्ताहरूले उनीविरूद्ध चार वटा शीर्षकमा जाहेरी दिएका थिए । त्यही मुद्दामा बयान तथा प्रमाण संकलन गरी दर्ता गरेको उनले बताए ।

उनीविरूद्ध मुलुकी अपराध संहिता २०७४ परिच्छेद–१० भेदभाव तथा अन्य अपमानजन्य व्यवहारसम्बन्धी कसुरको दफा ६५ सार्वजनिक शान्ति खलल पार्न नहुने, दफा १६५ सामाजिक रितिस्थितिमा खलल पार्न नहुने कसुर, दफा १६६ जातपातका आधारमा छुवाछुत वा अन्य भेदभावपूर्ण व्यवहार गर्न नहुने र दफा १६८ को अपमानजनक वा अमावनीय व्यवहार गर्न नहुने कसुरमा पनि जाहेरी परेको थियो ।

कार्यालयले उनलाई यी चार वटै मुद्दा गरी जम्मा एकदेखि पाँच वर्षसम्म कैद सजाय माग गरेको सहन्यायाधीवक्ता न्यौपानेले बताए ।