महोत्तरी, २५ फागुन । महोत्तरीमा मोटरसाइकललाई ट्रकले ठक्कर दिँदा पतिको मृत्यु भएको छ भने पत्नी घाईते भएकी छन् ।

ट्रकको ठक्करबाट मोटरसाइकलमा सवार महोत्तरीको गौशाला नगरपालिका वडा नम्बर–२ निगौलका ४० वर्षीय रामपुनित ठाकुरको मृत्यु भएको जिल्ला प्रहरी कार्यालय महोत्तरीले जनाएको छ । त्यस्तै उनको श्रीमती ३८ वर्षीया उर्मिला ठाकुर घाइते भएकी छन् ।

बुधवार दिउँसो औरही नगरपालिका–४ स्थित माईस्थान सम्सी सडक खण्डमा गौशालाबाट सम्सीतर्फ जाँदै गरेको प्रदेश २–०२–००३ प ५१५९ नम्बरको मोटरसाईकल र बिपरित दिशा तर्फबाट आउँदै गरेको ना ५ ख ७७२७ नम्बरको ट्रक एकआपसमा ठोक्किएको थियो ।

दुर्घटनामा घाइते भएका ठाकुरको प्रादेशिक अस्पताल जनकपुरधाममा उपचारको क्रममा मृत्यु भएको जिल्ला प्रहरी कार्यालय महोत्तरीका प्रवक्ता प्रहरी नायव उपरीक्षक प्रकाश विष्टले जानकारी दिए ।

त्यस्तै मोटसाइकलको पछाडी सवार मृतकका श्रीमती उर्मिला ठाकुर घाईते भएको र उनको प्रादेशिक अस्पताल जनकपुरमा उपचार भईरहेको प्रहरीले जनाएको छ ।