महोत्तरी, २४ फागुन । महोत्तरीमा सुमोले मोटरसाइकललाई ठक्कर दिँदा एक बालकसहित दुईजनाको मृत्यु भएको छ ।

मृत्यु हुनेमा मोटरसाइकल चालक महोत्तरीकोको गौशाला नगरपालिका–२ बस्ने २२ वर्षीय संजित मण्डल र सम्सी गाउँपालिका–१ पर्सा १२ वर्षीय धिरज मण्डल रहेका छन् ।

औरही नगरपालिका–४ कठुधारस्थित माईस्थान सम्सी गौशाला सडक खण्डमा सम्सीबाट गौशालातर्फ आउँदै गरेको अनटेस्ट मोटरसाइकल र विपरीत दिशाबाट जाँदै गरेको प्र.२–०२–००१ च.०८४१ नम्बरको सुमो ठोक्किएर दुर्घटना भएको थियो ।

दुर्घटनामा मोटरसाइकल चालक युवक संजित र पछाडि सवार बालक धिरज गम्भीर घाइते भएका थिए ।

दुबैजनालाई उपचारका लागि जलेश्वर अस्पताल लगिएको थियो । त्यहाँ चिकित्सकले दुबैजनालाई मृत घोषणा गरेको जिल्ला प्रहरी कार्यालय महोत्तरीले जनाएको छ ।

मृतक दुबैको शव पोस्टमार्टमका लागि जलेश्वर अस्पतालमा राखिएको र घटना विषयमा थप अनुसन्धान भइरहेको प्रहरीले जनाएको छ ।