महोत्तरीमा सवारी दुर्घटनामा परी एकको मृत्यु, तीनजना घाइते

महोत्तरी, २१ फागुन । महोत्तरीमा सवारी दुर्घटनामा परी एकजनाको मृत्यु भएको छ भने तीनजना घाइते भएका छन् ।
जिल्लाको बर्दिबास नगरपालिकास्थित पूर्व–पश्चिम महेन्द्र राजमार्गमा कन्टेनर र ट्रक एक आपसमा ठोक्किँदा एकजनाको मृत्यु भएको छ भने तीनजना घाइते भएका हुन् ।
बर्दिबास नगरपालिका ५ जंघा पुलमा भएको दुर्घटनामा ट्रक चालक महोत्तरीको बर्दिबास नगरपालिका–३ पाटु बस्ने ३० बर्षीय रुपेश बरायलीको मृत्यु भएको प्रहरीले जनाएको छ ।
उनको शुभ स्वस्तिक अस्पताल बर्दिबासमा उपचारको क्रममा मृत्यु भएको जिल्ल प्रहरी कार्यालय महोत्तरीका प्रवक्ता प्रहरी नायव उपरीक्षक प्रकाश विष्टले जानकारी दिए ।
बर्दिबास नगरपालिका वडा नम्बर–५ स्थित जंघा पुलमा सर्लाहीतर्फ जाँदै गरेको ना ३ ख ६९६४ नम्बरको कन्टेनर र विपरित दिशाबाट भुस लोड गरेको प्रदेश १–०२–००१ ख ९०९७ नम्बरको ट्रक एक आपसमा ठोक्किँदा दुर्घटना भएको प्रहरीले जनाएको छ ।
दुर्घटनामा परी अन्य तीन जना गम्भीर घाइते भएको र्डीसपी विस्टले जानकारी दिए ।
दुर्घटनामा कन्टेनर चालक ललितपुर माहाकाल गाउँपालिका–३ बस्ने ४२ वर्षीय राजु लामा, ट्रकमा सवार सर्लाहीको ईश्वरपुर नगरपालिका–१२ घाँरीबथान बस्ने २२ वर्षीया सुजता खड्का र सहचालक निरज परियार गम्भीर घाइते भएका छन् ।
लामालाई थप उपचारका लागि काठमाडौं पठाइएको छ भने खड्का र परियारको बर्दिबासको एक अस्पतालमा उपचार भइरहेको प्रहरीले जनाएको छ ।

