सर्लाही, १५ फागुन । सर्लाहीमा मोटरसाइकल दुर्घटनामा परी एक युवकको मृत्यु भएको छ ।

मृत्यु हुनेमा जिल्लाको कौडेना गाउँपालिका–३ का ३५ वर्षीय मनोज चौधरी रहेको प्रहरीले जनाएको छ ।

बरहथवाबाट कौडेनातर्फ जाँदै गरेको प्रदेश २–०३–०१९ प ३६०५ नम्बरको मोटरसाइकल आफैं अनियन्त्रित भई धनकौल गाउँपालिका–२ मधुवनी नयाँरोड सडकखण्डस्थित लँगडा पुलमा खस्दा चौधरीको मृत्यु भएको जिल्ला प्रहरी कार्यालय सर्लाहीका प्रहरी निरीक्षक जटाशंकर यादवले जानकारी दिए ।

टाउको र शरीरमा गम्भीर चोट लागी घाइते भएका चौधरीलाई उपचारका लागि बरहथवा पठाइएकोमा उपचारकै क्रममा उनको मृत्यु भएको हो ।

त्यस्तै मोटरसाइकलको पछाडि सवार कोडैना–५ का १८ वर्षीय दिपेश मुखिया घाइते भएका छन् ।