काठमाडौं, १३ फागुन । अभिनेता पल शाहलाई समात्न प्रहरी प्रधान कार्यालयले सबै प्रहरी युनिटलाई सर्कुलर गरेको छ ।

जबरजस्ती करणीको उजुरी परेपछि फरार रहेका अभिनेता शाहलाई पक्राउ गर्न प्रहरीले आन्तरिक सर्कुलर गरेको हो ।

शाहविरुद्ध जिल्ला प्रहरी कार्यालय तनहुँमा जबरजस्ती करणीको जाहेरी परेको छ । बुधबार एक नाबालिकाले शाहविरुद्ध जबरजस्ती करणीको जाहेरी दिएकी थिइन् ।

केन्द्रीय प्रहरी प्रवक्ता प्रहरी वरिष्ठ उपरीक्षक विष्णुकुमार केसीका अनुसार जाहेरी दर्तापछि शाहलाई खोज्न सबै प्रहरी कार्यालयलाई निर्देशन पठाइएको छ ।

महानगरीय प्रहरी परिसर काठमाडौं, महानगरीय अपराध महाशाखाले अभिनेता शाहको खोजी गरिरहेको प्रहरीले जनाएको छ ।

महानगरीय प्रहरी परिसर भक्तपुर र उपत्यकाका सबै वृत्तहरू पनि उनको खोजीमा सक्रिय रहेको बताइएको छ ।