इनरुवा, ९ फागुन । सुनसरीमा एम्बुलेन्सको ठक्करबाट एक जनाको मृत्यु भएको छ ।

जिल्लाको भोक्राहा नरसिंह गाउँपालिका–४ मा एम्बुलेन्सले ठक्कर दिंदा इनरुवा–५ का ३० वर्षीया निर्मला उराँवको मृत्यु भएको जिल्ला प्रहरी कार्यालयका प्रवक्ता प्रहरी नायब उपरीक्षक नरेन्द्रकुमार कार्कीले जानकारी दिए ।

पश्चिमबाट पूर्वतर्फ जाँदै गरेको प्रदेश २–०१–००१ झ ००२८ नम्बरको एम्बुलेन्सले उराँव सवार प्रदेश ०१–०२–०४१ प २१५५ नम्वरको स्कुटीलाई आइतबार साँझ ठक्कर दिएको थियो ।

ठक्करबाट गम्भीर घाइते भएकी उराँवको जिल्ला अस्पताल इनरुवामा उपचारका क्रममा मृत्यु भएको प्रहरीले जनाएको छ । उनी भोक्राहा नरसिंह गाउँपालिकाको भोक्राहा नरसिंह स्वास्थ्य चौकीमा सहयोगीको रुपमा कार्यरत थिइन ।

एम्बुलेन्स चालक सप्तरी विसनपुर–५ का २७ वर्षीय सुनिलकुमार मेहतालाई नियन्त्रणमा लिइएको प्रहरीले जनाएको छ ।