एजेन्सी, ९ फागुन । दक्षिण भारतका लोकप्रिय अभिनेता रामचरण नेपाल आउने भएका छन् । उनी चलचित्र सुटिङका लागि नेपाल आउन लागेका हुन् ।

उनी फेब्रुअरी २८ मा नेपाल आउने बताइएको छ । यद्यपि चलचित्रको नाम भने बताइएको छैन । चलचित्रको छायांकन काठमाडौं, मनाङ र मुस्ताङमा गरिने थ्री हिल्स प्रालिले जनाएको छ । छायांकनको व्यवस्थापन थ्री हिल्सले लिएको हो ।

थ्री हिल्सका अनुसार छायांकन आगामी अप्रिलबाट सुरु हुनेछ । पछिल्लो समय नेपालमा थुप्रै विदेशी चलचित्रको छायांकन हुँदै आइरहेको छ ।

यसभन्दा अगाडि अभिनेताद्वय केके मेनन र विजय सेतुपथी छायांकनकै सिलसिलामा नेपाल आएका थिए । सुन्दर प्राकृतिक छटाका कारण पनि नेपाल चलचित्रकर्मीको नजरमा परेको हो ।