एजेन्सी, ९ फागुन । बलिउड अभिनेता सोनु सुदको गाडी प्रहरीले नियन्त्रणमा लिएको छ । पञ्जाबमा भएको ११७ सदस्यीय विधान सभा निर्वाचनको मतदानस्थलमा जबरजस्ती गाडी घुसाउने प्रयास गरेपछि उनको गाडी नियन्त्रणमा लिइएको हो ।

यसपटकको चुनावमा सोनुकी बहिनी माल्भिका कंग्रेसको टिकटमा मोगाबाट चुनाव लडिरहेकी छन् । बहिनीको प्रचारका लागि सोनु अहिले पञ्जाबमा छन् । यहीबीचमा उनी मतदान भइरहेको स्थानमा गाडी लिएर जाने प्रयास गरिरहेका थिए ।

मोगा जिल्लाका पिआरओ प्रभदीप सिंहले सोनु जबर्जस्ती मतदानको बुथमा प्रवेश गर्ने प्रयास गरेकाले उनको गाडीलाई नियन्त्रणमा लिएर घर पठाइएको बताए । सोनुले पुनः गाडीलाई बाहिर निकाले कारवाही हुने उनले जानकारी दिए ।

यता सोनुले भने आफूहरू निष्पक्ष चुनाव चाहेकोले विभिन्न बुथमा विपक्षी दल अकालीका कार्यकर्ताले फोनमा धम्क्याउँदै भोट खसाउन लगाएको थाहा पाएर त्यसको अनुगमनमा गएको दाबी गरे ।

सोनुले मोगाका अर्का दलका उम्मेदवारले मतदातासँग भोट किनिरहेको आरोप लगाए । उनले यो मामलामा तुरुन्त एक्सन लिन प्रशासनसँग आग्रह गरेका छन् ।