सप्तरीमा ट्याक्टर दुर्घटना हुँदा एक जनाको मृत्यु, दुई जना घाइते

सप्तरी, ३ फागुन । सप्तरीमा ट्याक्टर दुर्घटना हुँदा एक जनाको मृत्यु भएको छ भने दुई जना गम्भीर घाइते भएका छन् ।
जिल्लाको डाक्नेशवरी नगरपालिका वडा नम्बर–९ स्थित महुकी पत्थरगाडामा ट्याक्टर दुर्घटना हुँदा छिन्नमस्ता गाउँपालिका वडा नम्बर–३ बस्ने २७ वर्षीय सन्तोष कुमार सदाको मृत्यु भएको हो ।
सप्तरीको अर्नाहाबाट पत्थरगाढातर्फ गइरहेको स.१ त ६१०८ नम्बरको रड लोड गरिएको ट्याक्टर सोमबार राति आफैं अनियन्त्रित भएर दुर्घटना भएको जिल्ला प्रहरी कार्यालय सप्तरीले जनाएको छ ।
दुर्घटनामा गम्भीर घाइते भएका सदाको उपचारका लागि राजविराजस्थित गजेन्द्रनारायण सिंह अस्पतालमा भर्ना गरिएको थियो ।
उपचारकै क्रममा उनको मृत्यु भएको जिल्ला प्रहरी कार्यालय सप्तरीका प्र्रवक्ता प्रहरी नायव उपरीक्षक माधवप्रसाद काफ्लेले जानकारी दिए ।
दुर्घटनामा परि छिन्नमस्ता गाउँपालिका वडा नम्बर–३ का २९ वर्षीय श्रीप्रसाद मण्डल र १८ वर्षीय युवराज सदा गम्भीर घाइते भएका छन् ।
घाइते दुवैजनाको राजविराजस्थित गजेन्द्रनारायण सिंह अस्पतालमा उपचार भइरहेको छ ।

