एजेन्सी, २८ माघ । बहुप्रतिक्षित चलचित्र ‘शमशेरा’ को निर्माण पक्षले चलचित्रको प्रदर्शन मिति घोषणा गरेको छ । रणवीर कपुर, वाणी कपुर र सञ्जय दत्त अभिनित यो चलचित्र २२ जुलाईमा सिनेमाहलमा सार्वजनिक हुनेछ ।

एक्सनले भरिपूर्ण यस थ्रिलर चलचित्रको अपडेट सार्वजनिक गर्दै यशराज फिल्म्सले ट्विटरमा लेखेको छ, ‘चलचित्र जुलाई २२ मा हलमा रिलिज हुनेछ । तपाईंको नजिकको सिनेमा हलमा मात्र ‘शमशेरा’ मार्फत् यशराजको ५० वर्ष पूरा भएको खुसी मनाउनुहोस् । यो चलचित्र हिन्दी, तमिल र तेलेगु भाषामा सार्वजनिक हुन तयार छ ।’

चलचित्रको रिलिज डेटसँगै टिजर पनि सार्वजनिक गरिएको छ । टिजरमा तीन जना कलाकार हतियारले घेरिएको मधुरो उज्यालो ठाउँको बीचमा बसेको देखिएको छ ।

करण मल्होत्राद्वारा निर्देशित यो चलचित्रलाई पिरियड एक्सन ड्रामा फिल्मको रूपमा वर्णन गरिएको छ । जसमा रणवीरले बाबु र छोरा दुवैको दोहोरो भूमिका निर्वाह गरेको देखिनेछ ।

फिल्ममा आशुतोष राणा, सौरभ शुक्ला र रोनित रोयको पनि अभिनय रहेको छ ।