एजेन्सी, २५ माघ । बिआर चोपडाले निर्देशन गरेको महाभारत टेलिसिरियलमा भीमको भूमिका निर्वाह गरेका अभिनेता प्रवीण कुमारको निधन भएको छ ।

कुमारको हृदयघातको कारण निधन भएको हो । उनी ७४ वर्षका थिए ।

कुमारकी छोरी निकुनिकाका अनुसार उनको हिजो राति पौने दश बजेतिर निधन भएको हो ।

महाभारतबाहेक उनको अन्य सिरियल तथा बलिउड फिल्ममा पनि भूमिका रहेको छ ।

उनी कलाकार बन्नुभन्दा अगाडि खेलाडी थिए । उनी एसियन गेम्स मेडलिस्ट पनि हुन् ।

उनको निधनमा युधिष्ठिरको भूमिका निर्वाह गर्ने गजेन्द्र चौहानले ट्विट गर्दै श्रद्धाञ्जली दिएका छन् ।

उनले लेखेका छन्, ‘आज बिहान एक दुःखद समाचार प्राप्त भयो । मेरो महाभारतका भाइ प्रवीण कुमारजी हामी सबैलाई छाडेर अनन्त यात्रामा चलेका छन् । विश्वास नै भएको छैन । तपाईं सधैं हाम्रो यादमा रहनु हुनेछ ।’