पर्सा, २४ माघ । पर्सामा मोटरसाइकल दुर्घटनामा परी आमा–छोरीको मृत्यु भएको छ ।

मृत्यु हुनेमा पर्साको जिराभवानी गाँउपालिका–४ भवानीपुरकी ३० वर्षीया विद्यादेवी थारू र उनकी ४ वर्षीया छोरी अन्या कुमारी रहेको प्रहरीले जनाएको छ ।

ट्याक्टरले मोटरसाइकललाई ठक्कर दिँदा विद्यादेवी र उनकी छोरी अन्याको मृत्यु भएको जिल्ला प्रहरी कार्यालय पर्साका प्रहरी उपरीक्षक रमेश बस्नेतले जानकारी दिए ।

आइतबार सुपौलीबाट पाण्डेपुरतर्फ जाँदै गरेको ना ४ त ८१४६ नम्बरको ट्रयाक्टरले सोही दिशातर्फ जादैँ गरेको बा ५५ प ६५२८ नम्बरको मोटरसाइकलाई भवानीपुरमा ठक्कर दिएको जिल्ला प्रहरी कार्यालय पर्साले जनाएको छ ।

दुर्घटनामा परेर छोरीको घटनास्थलमै मृत्यु भएको हो । आमाको भने उपचारको क्रममा आइतवार राति वीरगन्जस्थित नेशनल मेडिकल कलेजमा मृत्यु भएको प्रहरीले जनाएको छ ।