बुटवल, २४ माघ । रुपन्देहीको बुटवलस्थित तामनगरमा सडकमा रोकिराखेको ट्रकमा कार ठोक्किंदा कारमा सवार ३ जनाको मृत्यु भएको छ भने दुईजना गम्भीर घाइते भएका छ्न् ।

सोमबार बिहान ५ बजेतिर भएको दुर्घटनामा परी बुटवल–१३ का अन्दाजी २७/२८ वर्षीय सविन चौधरी, सोही स्थानकै गोविन्द चौधरी र नवीन श्रेष्ठको मृत्यु भएको प्रहरीले जनाएको छ ।

बुटवल उपमहानगरपालिका वडा नम्बर–१२ तामनगर नजिकै पूर्व–पश्चिम राजमार्गमा रोकिराखेको लु २ ख ९७७२ नम्बरको ट्रकमा लु ३ च ४४४२ नम्बरको कार सोमबार बिहान ठोक्किएको थियो ।

दुर्घटनामा सोही स्थानका भागिरथ चौधरी र बुटवल–१२ का अनिश जीसी घाइते भएका छन् । चौधरीको अवस्था गम्भीर र जीसीको अवस्था सामान्य रहेको प्रहरीले जनाएको छ ।

घाइतेहरूको लुम्बिनी प्रादेशिक अस्पताल बुटवलमा उपचार भइरहेको छ ।