जनकपुरधाम, २१ माघ । महोत्तरीमा पिकअप भ्यानको ठक्करबाट एकजना साइकल यात्रीको मृत्यु भएको छ ।

मृत्यु हुनेमा जिल्लाको सम्सी गाउँपालिका–४ गैँढाभेटपुर बस्ने ४० वर्षीय वीरेन्द्र राउत बरई रहेका छन् ।

हुलाकी राजमार्गअन्तर्गत सोनमा गाउँपालिका–३ स्थित सडकमा बिहीबार राति पिकअप भ्यानले ठक्कर दिँदा साइकलयात्री बरईको मृत्यु भएको हो ।

हुलाकी सडकखण्डको सम्सीबाट रघुनाथपुर जाँदै गरेको ज १ च ११६४ नम्बरको पिकअपले सोनमा–३ स्थित सडकमा विपरीत दिशाबाट साइकलमा आउँदै गरेको वीरेन्द्रलाई ठक्कर दिँदा उनको मृत्यु भएको जिल्ला प्रहरी कार्यालय महोत्तरीका प्रवक्ता प्रहरी नायब उपरीक्षक प्रकाश विष्टले जानकारी दिए ।

पिकअपको ठक्करबाट गम्भीर घाइते भएका उनलाई उपचारका लागि जिल्ला अस्पताल लैजाँदै गर्दा बाटोमै मृत्यु भएको थियो ।

घटना पश्चात पिकअपका चालक फरार भएका छन् भने मृतकको शव परीक्षणका लागि जिल्ला अस्पताल जलेश्वरमा राखिएको छ ।